[Bideoa eta galeria] Lan baldintza duinak, duin artatzeko
ELA sindikatuak antolatutako Gipuzkoan zehar dinamika Errenteria-Oreretara heldu da gaur. Gipuzkoako adinekoen egoitzetako hamarnaka langilek ibilaldia egin dute Beraungo Sanmarkosene egoitzatik Gabierrota auzoraino.
Erresidentzietako langileen protesta Errenteria-Oreretan lan baldintza duinak eskatzeko. ELA sindikatuak antolatutako Gipuzkoan zehar dinamika Errenteria-Oreretara heldu da gaur. Gipuzkoako adinekoen egoitzetako hamarnaka langilek ibilaldia egin dute Beraungo Sanmarkosene egoitzatik Gabierrota auzoraino. Bertan amaitu dute ibilaldi zaratatsua, baina bidean, Herriko plazan gelditu dira eta udaletxean ordezkaritza duten alderdi politiko guztiei zuzendutako idatziari sarrera eman diote.
Soldata duinak, lan baldintza duinak eskatzen dituzte erresidentzietako langileek. Feminizatutako sektorea da zaintzarena eta emakumeen borrokaren aldeko oihuak egin dituzte bide osoan horren harira. Maite Peña ere aipatu dute protestan, Gipuzkoako Foru Aldundiko gizarte gaietako diputatua da eta Errenteriako Udalean zinegotzi; gezurretan aritzea leporatu diote, eta lan gatazkari irtenbidea emateko borondatea erakutsi dezan galdegin.
Iñaki Artetxe Oarsoaldeko ELAko Gizalan taldearen ordezkariak gaur Errenteria-Oreretan egin duten protestarekin—Gipuzkoako beste hainbat herritan egiten ari dira— erresidentzietako gatazka sozializatu nahi dutela esan du, “herrietara ekarri dugu gatazka eta alderdi politiko guztiei zuzendutako idatzia aurkeztu dugu udalean, ondoren foru aldundia interpelatu dezaten, bat egin dezaten gure aldarrikapenarekin”.
Lan gatazka dela ukatu gabe, horrekin batera, gatazka soziala ere badela erresidentziena erantsi du ELAko ordezkariak. Ateak zabalik dituztela negoziaziorako esan du Artetxek, “itxoiten gaude, deitzen bagaituzte eseriko gara berriro ere, baina beti zerbait mamitsua baldin badago. aurreko bileran ez zuela garbi jokatu Maite Peñak salatu dugu ELAtik, hainbat gauza esan zizkigun eta ez ditu gauzatu. Gure ustez gatazka serioa da erresidentzietakoa eta serio hartu behar da”.
Feli Velazquez ELAko ordezkari sindikala da Sanmarkosene erresidentzian. Gatazkak Biharko Eguneko Zentroari eta Sanmarkosene egoitzari eragiten diela Errenteria-Oreretan zehaztu du: “Gipuzkoako gainontzeko erresidentzien egoeran gaude, foru aldundiak ez du esku hartu nahi gatazkan, baina beraiek dute konponbidea esku artean patronalekin hitzarmena lortu genuelako eta aldundiak ez badu finantzatzen ez dugu zer eginik”.
Ostiralean 118 egun beteko dituzte greban lan baldintza duinak exijitzen, baina baita adinekoei arreta egokia eta duina eskaini ahal izateko baldintzak eskatzen. Velazquezek gogor salatu du ezarri dizkieten gutxieneko zerbitzuak, “%80koak dira, gehiegizkoak”. Sanmarkosenen 130 langile dira eta 130 adinekoak dituzte egoitzan. 130 langile horien barruan ez dira soilik zaintzaileak sartzen, garbiketa langileak, erizainak eta bestelakoak ere sartzen dira.
