Kultur erauntsia dator
Datozen hiru hilabetetarako prestatu duten arte eszenikoen agenda aurkeztu dute gaur goizean Ion Collar Kultura zinegotziak eta Iker Tolosa Kultura teknikariak.
Tolosa, Collar, Bilbao eta Axiari. Datozen hiru hilabetetarako prestatu duten arte eszenikoen agenda aurkeztu dute gaur goizean Ion Collar Kultura zinegotziak eta Iker Tolosa Kultura teknikariak. Ez dira bakarrik aritu, kultur emanaldiei atea zabalduko dien Burdina ikuskizunaren protagonista diren Adriana Bilbao eta Beñat Axiari beren ikuskizunaren nondik norakoak azaldu dituzte. Hiruhilekorako , zirkua, dantza, antzerkia, zuzeneko musika eta poesia uztartu dituzte.
Hilaren 19an, larunbatean, emango dute Burdina Niessen Kulturgunean 20:00etan. Flamenkoa eta tradizioa uztartuta heldu dira ikuskizun horretan. Andaluziatik Bizkaira iritsitako migratzaileen kontaketa egiten du, ikuslea meategietara eta meatzariengana hurbilduz. Gerezien denbora pastoralean dituela sustraiak Burdina ikuskizunak esan du Axierik, “altzairu langileen istorioa kontatzen du eta Barakaldon eman genuenean Tximini elkarteko Ibai Etxezaharraga eta Benat Guarrotxena ezagutu genituen eta industria osteko garaian sarrarazi gintuzten. harri zulatzaileak ezagutu genituen, eta gero Adriana Bilbao ezagutu genuen. Artista ikaragarria da, eta pentsarazi egin zidan bizkaitar bat nola maitemindu daitekeen flamenkoarekin”.
Ikuskizunean beraz, harri zulatzaileak, Andaluziatik heldutako migratzaileak, flamenkoa eta euskal kantuak uztartu dituzte. Emaitza, berriz, ikusgarria omen da.
Sorkuntza prozesuaz mintzo da Bilbao ere. Bi urte dira elkarlana hasi zutela eta berari esperientziak bere erosotasun eremutik irtetea suposatu diola esan du, “ia 20 urte dira flamenkoa dantzatzen hasi nintzela eta horretan aritu naiz batez ere, eta diziplina ezberdinetako jendearekin harremanetan jartzeak gitarrista eta abeslari flamenkoa badaude baina Beñaten kantatzeko modua oso askea da, oso berezia, eta erronka izan da elkarrekin sorkuntzan aritzea, ni nire lengoaian eta bere berean”. Hala ere bi lengoaiak batzea lortu dutela erantsi du, bakarra sortzea lortu dutela eta gainera, ikuskizun bizia dela, “ez dagoelako itxia, emanaldi bakoitzean irteten denari bide ematen diogulako”.
Emaitzarekin pozik azaldu da Bilbao, “ikusleek gustuko dutelako eta lan taldekoek gozatu egiten dugulako ikuskizuna egiten. Ikertzeko gogoa dugu, besteak egiten duena ezagutzeko. Pentsa, harri zulatzaileak ez dira normalean oholtza gainera igotzen, eta ikuskizunaren parte izatea oso ederra da. bakoitzak gure ekarpena egin dugu eta horrek egiten du lanak bizirik jarraitzea, bakoitzean zerbait berria dagoelako”.
Emanaldi hori larunbatean izango da, baina ez da bakarra izango. Asteburu honetan bertan, beste ikuskizuna prestatu dute: La estampida konpainiaren Las princesas del Pacifico antzezlana ikusteko aukera izango da igandean, 19:00etan hasita.
Hilabetea amaitzeko, berriz, D´Click taldeak Isla lana ekarriko du Kulturgunera familia osoari begira. Urriaren 25ean izango da hori, 18:00etan hasita.
Yuriren asmoa betetzea xede duen espora txiki baten bidaia kontatuko du Bacumek familiei zuzendutako Blowing ikuskizunarekin. Azaroko lehena izangod a emanaldi hori, 15ean zehazki, 18:00etan. Azaroaren 16an, Bilaka taldeak euskal dantzaren ikuspegi berritzailea eskainiko du Saio zero lanarekin. Egun bat geroago, Artedrama,. Xut! eta Dejabu konpainien elkarlanetik sortutako Zaldi urdina antzezlana izango da 19:00etan. Heroinak eta drogek herri honetan utzitako iragana gogorra ia ahaztuta dagoenean, belaunaldi berriekin berriz ere, heroina berriro ere presente dago. Hiru konpainiek drogen gaiaren gainean hausnartu egin dute ikuskizunean, zertarako drogak hartu, zer bilatzen den kontsumo horrekin.
Azken txanpa abenduan helduko da eta ordurako Janeten titia, Ertza konpainiaren lana programatu dute 1ean, 19:00etan, eta 7Burbujas konpainiaren Burbuja emanaldia familia osoari begira.
Emanaldi guztiek ardatz komuna dutela zehaztu du Tolosak, kalitatea. Sarrera guztiak salgai dira jada Collarrek azaldu duenez Kulturguneko leihatilan astelehenetik ostiralera 10:00etatik 13:00etara eta 17:00etatik 20:00etara. Ikuskizunaren egunean bertan ere erso daitezke emanaldia baino ordubete lehenago, eta baita online ere. Helduentzako ikuskizunen sarrera 8 euroan eros daiteke, eta familiei zuzendutakoa 3 euroan. Kultura txartelaren titularrek %20ko deskontua dute.
Flamenko tailerra
Programazioa aurkeztaerakinbatera, Bilbaok larunbatean bertan Niessen Kulturgunean eskainiko duen flamenko tailerra ere aurkeztu dute. Flamenkoarekin lehen hartu emana izan nahi dutenei zuzendutako tailerra da, saioa doakoa da, eta Niessen kulturguneko hirugarren solairuko dantza gela batean egingo dute ordubetez. Parte hartu nahi dutenek, izena eman beharko dute aurretik.
