Maddi Fernandez, Gipuzkoako eta Euskal Herriko txapeldun bodyboard-ean
Maddi Fernandez lezoarrak larunbat honetan lortu du herrialdeko txapela, Donostiako Zurriolan egindako txapelketan. Irailean eskuratu zuen Euskal Herrikoa.
Maddi Fernandez, larunbatean Zurriolan lehian. Maddi Fernandez bodyboard kirolari lezoarrak txapelak pilatzen jarraitzen du. Joan den asteburuan, larunbatean eta Donostian, Gipuzkoako txapeldun izan zen hirugarrenez bodyboardean, 2014an eta iaz ere lortu zuen txapel hori. Baina ez hori bakarrik: irailaren 21-22ko asteburuan Euskal Herriko txapeldun izan zen Fernandez, Sopelan. Bizkaiko proba hori, aldi berean, EuskalSurf zirkuituko lehena izan zen: emakumeen kategoriako beste biak Itzurunen (Zumaia) asteburu honetan itsasoak baimentzen badu, eta Ereagan (Getxo) egingo dituzte.
Bidea zabaltzen ari da Fernandez: mutilekin hasi zen lehian gazte-gazte zela, kirol horretan emakume bakarra zela. Baina egun, apurka bada ere, lezoarraren bideari jarraiki, ari dira pixkanaka emakumeak hurbiltzen bodyboard lehiaketetara, nahiz eta oraindik esperientzia handiegirik ez duten. Ziur lortuko dutela behar adinako esperientzia eta maila, eta estuasunetan jarriko dutela kirolari lezoarra.
Larunbatekoa
Donostian larunbatean egindako Gipuzkoako Bodyboard Txapelketan (surfekoa ere egin zuten) gustura aritu zen Maddi Fernandez. Olatuak handiak izan ziren, eta finalean, olatu horiekin duen esperientzia baliatu zuen: “Zaila izan zen, kristoren olatuak zeuden. Olatu handietan ondo moldatzen naiz, badut esperientzia. Asko gozatu nuen finalean. Handiak ziren olatuak, baina oso onak”. Fernandezekin batera txapelketan izan ziren neskek ez zuten hainbesteko esperientziarik, eta zail egin zitzaien lehiatzea, bai korronteagatik, baita olatuen tamainagatik ere.
Irabazi bai, baina zazpore gazi-gozoarekin gelditu zen Fernandez: bigarren izan zen Rebeka Antiak istripua izan zuen, kolpea hartu zuen taularekin eta ospitalera eraman behar izan zuten; gaur arte egon da bertan. Hirugarrena finalean Rocio Leizaola izan zen.
