Poblado, Salinas eta Andonaegiko eraberritzeak eztabaidatzeko bilerak egingo dituzte
Trintxerpe eta San Pedroko auzuneen eraberritzea hasi baino lehen, bizilagunekin batzartuko da Pasaiako udala haien iritziak jasotzeko.
Pasaiako Udalak eraberritu nahi dituen hiru auzoak. Urteak dira San Pedro eta Trintxerpeko auzo garaien bizilagunek, hobekuntza ugari eskatzen dituztela. Azpiegiturak zaharkituta daudela eta, haien auzoetan bizi baldintzak beste batzuetan baino okerragoak direla salatu dute sarritan.
Pasaiako Udala hiru auzoen eraberritze, birgaitze eta kudeaketarako plana osatzen hasiko da. Bizilagunek luzaz eskatutako plan bat denez, eta haien egunerokoan eragin handia izango duenez, udalak bilerak egingo ditu bizilagunekin, informazioa partekatzeko eta haien iritziak jasotzeko.
Eraberritze planak hiru helburu izango ditu: etxebizitzen irisgarritasuna hobetzea, etxebizitzen baldintza energetikoetan hobekuntzak egitea eta instalakuntzak berrantolatzea. Herritarrez gain, ordezkari politikoek, udal arkitektoek, eta plana idazteko kontratatu diren UTE langileek parte hartuko dute bileretan.
Lau bilerak —bi Salinas eta Pobladoko bizilagunekin eta beste bi Andonaegiko bizilagunekin— azaroan zehar egingo dira, Trintxerpeko Alkateordetzan.
Bilerak non eta noiz.
- Azaroak 5, asteartea, 18:30ean Andonaegiko bizilagunekin.
- Azaroak 6, asteazkena, 18:30ean Salinas eta Pobladoko bizilagunekin.
- Azaroak 25, astelehena, 18:30ean Andonaegiko bizilagunekin.
- Azaroak 27, asteazkena, 18:30ean Salinas eta Pobladoko bizilagunekin.
