'Lezoko toponimia' liburua larunbatean aurkeztuko du herrian Lander Zurutuza historialariak
Lander Zurutuza Patri Urkizurekin eta Luzien Etxezaharretarekin izango da 12:00etan hasiko den aurkezpenean. Liburua erosteko aukera egongo da.
Lander Zurutuza. Lan mardula, osoa, egin du Lander Zurutuza historialari, eta aldi berean Andreone Udal Liburutegiko liburuzain lezoarrak. Ia 500 orrialdetan Lezoko toponimiaren gaineko xehetasunak jaso, eta zabaldu nahi izan ditu Lezoko toponimia liburuan. Larunbatean aurkeztuko du herrian. 12:00etan da xehetasunak emateko agerraldia, Zabalanea etxeko sotoan (Gurutze Santuaren plaza, 2).
Maiatz argitaletxearekin kaleratu du Zurutuzak 2000. urtetik landu duen leku, etxe, baserri, erreka, zubi, iturri, gotorleku eta abarren izenen azalpenen bilduma, egileak azaldu duenez, “bai noizbait galdu zirenak, bai gaur egun galtzear nahiz bizi-bizirik daudenak”. Aurkezpenean, alboan izango ditu Patri Urkizu idazle lezoarra, eta Luzien Etxezaharreta editorea.
Aldi berean, bertan liburua erosteko aukera izango dute hala nahi dutenek, 20 euroan.
HITZAk Zurutuzari egindako elkarrizketa argitaratuko du ostiraleko papereko edizioan.
