Ostiralean egingo du urteko batzarra Lartaun Txirrindulari Elkarteak
Lartaun ZIkloturista eta Txirrindulari Elkarteko bazkideei deia egin diete ostiraleko 19:45ean (lehen deialdia da) Manuel Lekuonara hurbiltzeko.
Lartauneko hainbat kideren artxiboko irudia. Oiartzungo Lartaun Zikloturista Txirrindulari Elkarteak urteroko bazkideen ohiko batzar orokorra egingo du ostiralean (hilak 25), Manuel Lekuona Bibliotekako areto nagusian, 19:45ean lehen deialdian eta 20:00etan bigarrenean. Horrela, sasoiari bukaera emango diote, sasoi amaierako afariaren zain (azaroaren 23an da). Batzarrean landuko dituzten puntuak honakoak dira:
- Zikloturimoa. 2019ko balantzea: irteerak, istripuak, diru sarrerak eta gastuak…
- Datorren urteari begirako proposamenak: irteerak, ordutegiak…
- 72. Xanisteban Txirrindularitza Sariaren balantzea.
- Denboraldi bukaerako afaria.
- Besteak.
Kirol elkartekoek aurreratu dutenez, aurten martxoaren lehen igandetik irailaren azkenekora luzatu dute sasoia, igande eta jaiegunetan egin dituztelarik irteerak: orotara, 3.500 kilometro egiteko aukera izan dute taldearekin bat egin dutenek, “Gipuzkoa, Nafarroa eta Ipar Euskal Herriko hainbat txoko ikusiz eta ezagutuz”.
104 bazkide izan dituzte sasoian, gehienak oiartzuarrak eta errenteriarrak. Baina Lezo, Pasaia, Astigarraga edo Donostiako bazkiderik ere izan dute.
Herrira begirako ekitaldien artean, elkarteko kideek nabarmendu dituzte abuztuaren 11ko 72. Xanisteban Txirrindularitza Saria eta Arditurri Egunean (irailaren 15ean) egin zuten lana.
Afaria, azaroaren 23an
Elkarteko arduradunek, bestalde, iragarri dute sasoia bukatzeko afaria azaroaren 22an egingo dutela, Tolare jatetxean. Bertan egon nahi dutenei eskatu diete euren presentzia ahalik eta azkarren konfirmatzeko. Ostiraleko batzarrean afariaren gaineko xehetasun gehiago emango dituzte.
