Bai Euskarari Saria jaso du ABB Niessenek
ABB Niessen enpresarekin batera, Deustuko Bordatxo jatetxea eta AEKko Koordinatzaile Nagusia izan den Mertxe Mujika ere saritu ditu Bai Euskarari elkarteak.
Saridunak ekitaldian, saria jasota. Bai Euskarari Elkarteak Bai Euskarari Saria eman dio ABB Niessen enpresari, “euskarari, eta euskararen unibertsoari argia, energia, eta indarra emateagatik. Euskaraz lan egin eta euskaraz bizi nahi dugunontzat erreferente dira gaurko sarituak”.
ABB Niessen enpresarekin batera, Deustuko Bordatxo jatetxea eta AEKko Koordinatzaile Nagusia izan den Mertxe Mujika ere saritu ditu Bai Euskarari elkarteak. Euskararen bidea geroz eta argiagoa izan dadin lanean ari diren pertsonek hartu dute Bai Euskarari Sariak ekitaldian.
ABB Niessen enpresako euskara batzordeak hogei urte bete ditu aurten eta, urte berean, Bai Euskarari Saria jasota borobildu dute urteurrena. Niessen lantegian atxikipen handia dute euskararekiko, langileen kohesiorako gako garrantzitsua bihurtzeraino. Bai Euskarari ziurtagiria dute, Bidean maila.
