[Galeria] Zaporen bizitza ospatu dute ehunka herritarrek
Goizetik ari dira ospatzen Poza Festa ehunka oiartzuarrek, Ion Zabaleku 'Zapo' omendu eta utzitako guztia eskertzeko.
400 lagun inguru bildu dira Madalensoro pilotalekuan bazkaltzeko. Pasa den apirilean hil zen Ion Zabaleku Zapo, gaixotasun baten ondorioz. Hark utzitako hutsunea, handia da, aski ezaguna eta maitatua baitzen Zapo Oiartzunen. Herrigintzan aritutako mutila zen Zapo, bereziki bere auzoan, Iturriotzen, bertako jai batzordeko kide baitzen. Ihoteetan aritutakoa ere bazen Zapo.
Lagun eta ezagun asko utzi dituela agerikoa da, gaur antolatu duten jaialdia ikusita. Alaitasunez eta jai giroan omendu dute gaur Zapo. Poza Festa ari dira ospatzen gaur goizetik Oiartzunen. 11:00etan hasi dute jaia, agurrarekin eta Jokin Uranga eta Jon Martinen bertsoekin.
Jarraian, auzoen arteko desafioari ekin diote. Nor baino nor aritu dira parte hartzaileak, betiere giro adeitsua izan da nagusi. Ergoienek irabazi du desafioa, eta Iturrioztarren eskutik jaso dute makila. Desafioaren ondoren herri bazkaria zuten zain. 400 pertsona inguru bildu dira Madalensoro pilotalekuan bazkaltzeko. Goraino bete dute frontoia haur, gazte heldu eta adinekoek. Mahai ondorengoa, Ane Badiola, Joxe Leon Kazabon eta Irati Odriozola abeslariek girotu dute.
Festa baina, ez da bukatu, Ihoteron ikuskizuna eskainiko dute, 18:00etan hasita. Plazan bertan afaltzeko aukera egongo dela jakinarazi dute antolatzaileek. Kontzertuekin bukatuko da Poza Festa: Susmo eta Gozategi taldeak igoko dira oholtzara.
HITZA Poza Festan izan da eta honako irudi hauek bildu ditu.
