Juanito Mitxelena bertsolaria hil da
Atzo arratsaldean hil zen Oiartzungo bertsolaria, Bertsozale Elkarteak jakitera eman zuenez. Vascongada beilatokian izango da gaur 21:00ak arte.
Mitxelena Herriko Bertso Txapelketan 2007. urtean- Atzo hil zen Juanito Mitxelena bertsolari oiartzuar handia. Oarsoaldeko bertsolaritza mugimenduan ezinbesteko eragilea izan zen Mitxelena. Bertsozale Elkarteak eman zuen Mitxelenaren heriotzaren berri, atzo arratsaldean. Egun berean Berria egunkariak haren ibilbidearen laburpena egin zuen albiste batean.
Hainbat saltsatan aritutakoa zen Mitxelena, baina bereziki bertsolaritzari emandako bultzadagatik oroituko dute Oiartzunen. Oarsoaldeko bertsolaritza panoraman zeresan handia izan zuen Mitxelenak.
1953. urtean jaio zen Juanito Mitxelena Karrikako Oiantzabal baserrian. Baserriko semea izanik, nekazaritza lanetan aritutakoa zen gaztetatik. Dena dela, herrian eta eskualdean bertsolaritzaren alde egiteagatik nabarmendu zuen bere burua Karrikakoak.
Oiartzungo bertso eskolako egindako ekintza askotan parte hartu zuen Mitxelenak, eta oro har bertsolaritzarekiko prestutasuna agertu zuen. Oiartzungo Bertso astearen sortzaile eta antolatzaile izan zen, eta 1995. urtetik hainbatetan parte hartu zuen Gipuzkoako Bertsolari Txapelketan. 2007. urtean sailkapen faserako sailkatu zen Karrikako bertsolaria.
Oiartzungo Vascongada beilatokian izango da gaur, 21:00ak arte. Astelehenean emango diote azken agurra 19:00etan San Esteban elizan.
