Antxoko geltoki berriaren proiektua Adif-eri helaraziko dio Pasaiako Udalak
Aho batez onartu zuen bart Pasaiako udalbatzarrak Antxoko geltokia birmoldatzeko proiektu herrikoia, baina ñabardurekin. Udal gobernuak asmoa babestu zuen, ez ordea plan teknikoa.
Antxoko Geltoki Berriaren Plataformak trenbidearen eremua optimizatu nahi du, herriak iparraldean espazioa irabaz dezan. Adif-ek Antxoko tren geltokia birmoldatuko zuela jakinarazi zuenetik, zenbait herritar antolatzen hasi ziren, proiektua Antxo zabaltzeko aukera izan zedin. Antxoko Geltoki Berriaren Plataformak trenbidearen eremua optimizatu nahi du, herriak iparraldean espazioa irabaz dezan.
Helburu horri jarraiki, plataformak kanpaina informatiboa abiatu zuen, baita sinadura bilketa ere. 800 lagun ingururen sinadurak bildu dituzte eta plataformaren proiektuarekin batera, mozio gisa aurkeztu zuten atzo ohiko udalbatzarrean.
Plataformako bi kide izan ziren bertan, tartean Eduardo Perez Antxoko Geltoki Berriaren plataformaren sortzailea, “gure proposamena nahiko argi dagoela uste dugu. Antxo lau bazterretatik mugatua dago, espazioa behar du herritarrok bizitza kalitate hobea izan dezagun. Ez dezagun aukera hau galdu”.
Aho batez onartu zuten alderdi guztiek proiektu herrikoia, baina ez zen baiezko borobila izan. Espazio urbanoa berreskuratzeko aldarria bere egin zuten Pasaiako Udalean ordezkaritza duten lau alderdiek, eta plataformaren eskaria Adif-eri bidaltzeko konpromisoa hartu zuten. Proiektuari dagokionez ordea, ñabardurak plazaratu zituzten.
Pasaiako Podemosek babes osoa adierazi zion plataformaren proiektuari eta antolakuntzan ibilitako herritarren lana eskertu zuten. Proposatutakoa, funtsean trenbideen moldaketa bat delarik, Podemosen babesa jasoko zuela, betiere udal teknikarien oniritzia jasotzean.
Udal gobernuko kide PSE eta EAJk alde bozkatu zuten baina hainbat zalantza agertu zituzten. Argi utzi zuten birgaitze urbano, eta espazioen berreskuratzearekin duten konpromisoa, baina arlo teknikoari dagokionez, ez zuten erabateko adostasuna agertu. Hasteko, hainbat eskuduntza beste erakunde batzuen menpe daudela gogorarazi zuten eta gainera teknikoki proiektua bideragarria den, aztertu behar dela gaineratu zuten. Izaskun Gomez alkateak, “errealistak izateko” eskatu zien plataformakok kideei, proiektuak luze joko baitu eta posible delako geltokira mugatzea soilik.
EH Bilduk bestalde, zuhurtziaz erantzun zuen. Podemosek bezala, plataformako kideak zoriondu zituen egindako lanagatik eta proiektuarekin guztiz ados zeudela nabarmendu zuten. Baina proiektuak adituen analisi teknikoak beharko dituela ere adierazi zuten. Dena dela, Antxorrentzat aukera paregabea delakoan, gaia seriotasunez jorratzea proposatu zien beste udal taldeei, gobernu, oposizio eta plataforma bilduko dituen batzorde bat eratuz.
