Azaroaren 25aren harira, ahalduntze ikastaroa eta hitzaldia Lezon
Azaroak 25 hurbil izanik, Gaxuxa Emakume Elkarteak eta Lezoko Udalak jada aurkeztu dituzte lehen ekitaldiak. Gehiago izango direla iragarri du udalak.
Loredi Salegik gidatuko ditu ikastaroa eta hitzaldia- Emakumeenganako Indarkeriaren Kontrako Nazioarteko Eguna da azaroaren 25a. Horri begira, Gaxuxa Emakume Elkarteak eta Lezoko Udalak elkarlanean bi jarduera antolatu dituzte. Batek Irakurketa ahalduntzeko izena du, eta ikastaroa da (azaroaren 13an hasiko da); bestea hitzaldia da, Sexu erasoak. Zer gertatzen ari da? lelopean egingo dena (azaroaren 22an). Horiez gain, udalak iragarri du kanpaina zabalagoa egingo duela Gaxuxarekin, Kuadrillategirekin, Lezoko Osasun Zentroarekin, Osakidetzarekin, Pasaia-Lezo Lizeoarekin eta Lezo Herri Eskolarekin elkarlanean.
Irakurketa ahalduntzeko ikastaroari dagokionez, Gaxuxak iragarri du azaroaren 13an hasi eta maiatzean bukatuko dela. Doan da, eta saioak hilean behin izango dira, hil bakoitzeko hirugarren asteazkenetan, 17:00etan (Kultura Aretoan). Bigarrenez antolatu dute ikastaroa: helburua da irakurketaren bidez parte hartzaileek gogoeta egitea, eta ahalduntzeko aukerak eskaintzea. Horretarako hainbat liburu irakurri eta aztertu (asteazkenetako saioetan) beharko dituzte partaideek. Loredi Salegi izango da ikastaroaren gidaria.
Hitzaldia
Ahalduntze ikastaroaz gain, Gaxuxak eta udalak azaroaren 22rako hitzaldia antolatu dute. 17:00etan da, Kultura Aretoan. Loredi Salegik gidatuta Sexu erasoak. Zer gertatzen ari da? galderari erantzuna ematen saiatuko dira. Bertaratzen direnei indarkeria matxistaren kontrako poltsa emango diete.
Udalak hitzartuta dauden ekitaldi horietan, nahiz azaroaren hasieran aurkeztuko dituztenetan parte hartzeko eskatu die lezoarrei: “Indarkeria matxistari aurre egitea guztien ardura delako, eta eraso sexistak gaitzesteko indarrak batzea ezinbestekoa delako”.
