Kataluniari elkartasuna adierazteko mozioa onartu du Pasaiako Udalak
EAJ, Podemos eta EH Bilduk aldez aurretik iragarritako mozioa babestu dute. Herritarrei hitza ematea, ezin duela delitua izan defendatu dute hiru alderdiek.
EH Bildu, Podemos eta EAJ mozioaren alde bozkatu zuten. Hilaren 17an iragarri zuten Pasaiako EH Bilduk, EAJk eta Podemos Equo Berdeak, Kataluniako preso, erbesteratu politikoei, kataluniar herriari eta erakundeei elkartasuna adierazteko mozioa aurkeztuko zutela. Atzoko udalbatzarreko 9. puntua izan zen elkartasun adierazpenarena eta ez zen ezustekorik izan; mozioa onartu zuten hiru udal taldeek.
PSE ordea, ohi bezala lerratu zen, errespetua adieraziz Espainiako Auzitegi Gorenak hartutako erabakiari. Sozialistek haien mozio propioa aurkeztu zuten, Madrilgo PSOEren erretorika bere eginez, baina ez zuten beste taldeen babesik lortu.
Mozioa aurkeztu zuten hiru alderdiek nabarmendu zuten epaia neurrigabea dela eta Kataluniako auziaren irtenbidea, politikoa izan behar duela ezinbestean. Podemos alderdiko bozeramaile Julen Rodriguezek, epaiak aurrekari arriskutsu bat ezarri duela adierazi zuen, “epai honek ekintzailetza zibila eta sedizioa lotu ditu. Erabakiak ez du inongo eragin positiborik Kataluniako herriarengan, alderantziz, banaketa soziala sakonduko du”. Moreek babes osoa adierazi zieten modu baketsuan mobilizatu diren herritarrei eta gogorarazi dute, oro har, mobilizazio guztiak baketsuak izan direla Katalunian. Era berean bi aldeetan gertatutako ekintza bortitzak arbuiatu dituzte, “egunotan gertatutako poliziaren kargak errefusatzen ditugu, bortizkeria dakarren edozein ekintzaren aurka gaude. Bidegabekeriek ez dute biolentzia justifikatzen”, esan zuen Rodriguezek.
Mozioak iritzi kontrajarriak azaleratu ditu udal gobernuan, EAJko Nahikari Oterminek argi adierazi baitzuen herritarrei modu baketsuan hitza ematea, ezin duela delitua izan, “galdeketa bat egiteak edota nahi izateak, ez du esan nahi independentziaren aldeko botoa emango dutenik beharrez. Herritarrei hitza emateko aukera ematea dena den, ezin du izan norbait espetxeratzeko arrazoia izan”.
EH Bilduk azaldutakoaren arabera, bederatzi buruzagi presoen kontrako epaia, zigor kolektibo da, “gure etorkizuna erabaki nahi dugu guztion kontrako zigorra da. Epai honek argi utzi beste behin, estatuak botere judiziala tresna politiko gisa erabiltzen duela”, azaldu zuen Iraitz Pazos zinegotziak. Epaia eredugarri izan nahi duela gaineratu zuten, autodeterminazio eskubidearen alde egitearen ondorioak “gerra ekonomikoa, 155a eta espetxea” izango direla frogatuz. Koalizioko kideen ustez, Espainiar Estatuak arazo politikoei irtenbide demokratikoak emateko ezintasuna erakutsi du beste behin. Horren aurrean, EH Bildu Kataluniako herriaren alde jarriko dela nabarmendu zuten, eta gaur arratsaldean Pasaiako badia argiztatzeko gonbita luzatu zioten herritarrei.
