Pasaiako badian ere, demokraziari bidea argitu diote herritarrek
Ehunka pertsonek badiaren bokaleko bi bazterrak argitu dituzte, demokraziaren alde eta Kataluniar herriari babesa emateko. Bide berri bat argitu daitekeela frogatu dute.
Bokaleko bi bazterrak argitu dituzte ehunka herritarrek. Argazkia: Gure Esku. Gutxitan izan da hain ikusgarria Pasaiako badiaren bokalea. Ehunka argi izpik bi bazterrak argitu dituzte, Kataluniako herriari, beste behin, babesa adierazteko eta erabakitzeko eskubidea defendatzen jarraituko dutela berresteko. Argi dugu bidea leloari jarraiki herritarrek bat egin dute Gure Eskuk egindako deialdiarekin. Ekintza esanguratsua izan da, badia argiztatzeko ekintza astelehenean iragarri baitzen, baina herritarrek ez dute huts egin. Erreferendumak inoiz ezin duela delitua izan, argi adierazi dute.
Donibanen Alabortza inguruan hasi da argien katea eta kasik Bonantzaraino egin du ibilbidea. San Pedron ordea, puntetan hasi, eta Platako Farolara igotzen den eskailera argiztatu dute. Goiko partetik pankarta erraldoia atera dute Erreferenduma demokrazia da esaldiarekin. Era berean azpiko itsas-morruan demokrazia hitza osatu dute zenbait lagunek kartelak eskutan zituztela.
