Haizeteek karpa bat bota zuten Donibanen igande goizaldean
Ezbeharra gertatu zen unean ez zegoen inor barruan eta ondorioz, ez zen zauriturik izan. Karpaz gain, ez da bestelako kalte materialik izan.
Haize boladek karparen parte bat porturaino eraman zuten. Asteburuko denboraleak triskantza eragin zuen Donibanen kokatutako karpa batean. Karpa Juanba Berasategi auditorioaren atzean zegoen kokatuta, Nabalaldeko sarreraren alboan. Haize ufadek karpa guztia eraman bazuten ere, ez zen zauriturik izan, hutsik baitzegoen ezbeharra gertatutako unean. Karpa eta haren barruan zeuden produktuak ordea kalte handia jasan zituzten. Horiez gain, ez zen bestelako kalte materialik izan.
Karpak egun osoko jaialdia hartu zuen larunbatean. Eguraldi txarraren ondorioz Santio jaietan bertan behera geratu ziren jaialdia eta kontzertuak, aurreko larunbatean egitea erabaki zuten antolatzaileek. Orduan ere, eguraldi txarra izan zen protagonista.
Eguraldi txarra iragarrita bazegoen ere, egunean zehar eguraldia ez zuela bestelako ondoriorik eragin, jakinarazi dute antolatzaileek. Gauean ordea, eguraldia okerrera egin zuen eta igande goizaldean haize boladek karpa gogor astindu zuten karpa. Egoera arriskutsu bihurtu zitekeela ikusita, udalak kontratatutako karpa hustu zuten antolatzaileek.
Goizeko 5:00etan karpa itxita zegoen eta antolatzaileek etxera alde egin zuten. Bi ordu beranduago, udaltzainek haizeak karpa guztiz bota zuela jakin zuten eta bertara iristean kristalak, plastikoak eta bestelakoak topatu zituzten nonahi. Eguraldia baretu ahala, garbiketari ekin zioten hainbat herritarrek. 14:00ak aldera, karpa jaso zuten eta inguru guztiak garbitu zituzten.
