Miren Arrieta 'kuxkuxeroa', gaur, Lezon
Miren Arrieta aktorea Lezon izango das gaur, bere esperientzien berri gazteei emateko, Kuxkuxeroak egitasmoaren barruan, eta euskaraz.
Miren Arrieta. Argazkia: Gosua Management. Oarsoaldeko Euskara Batzordeak aurten ere Kuxkuxeroak egitasmoari ekin dio. Gazteen euskararen erabileran eragin nahi duen egitasmoa da, eta horretarako, eredu izan daitezkeen pertsonekin saioak antolatzen dituzte, bereziki 12-16 adin tarteko gaztetxoentzat. Gaur da proiektuaren sasoiko lehen saioa Oarsoaldean, Lezon: Miren Arrieta aktoreak (besteak beste ETB1eko Goazen!-en ibilitakoa da) gazte lezoarrekin arratsaldea konpartituko du, 19:30ean hasita, Lezo Herri Eskolako soinketa gelan. Ez da aldez aurretik izenik eman behar, eta aretoa bete arte sar daitezke partaideak.
Azaroan Kuxkuxeroak-en barruko beste hiru saio egingo dituzte, Oarsoaldeko gainontzeko hiru herrietan. Horrela, hurrengoa azaroaren 15ean da: Nerea Izagirre Realko jokalaria Errenteria-Oreretan izango da; Izagirrek hilaren 29an errepikatuko du saioa, baina Pasaian. Hilaren 22an, berriz, Huntza taldekoak Oiartzunen izango dira, Gaztetxean, 17:00etan.
Oarsoaldeko Euskara Batzordeak adierazi du hedabideetan agertzen diren pertsonaiak eredu izan daitezkeela gazteentzat, eta euren portaerak kopiatzeko ohitura izan ohi dutela. Eta pertsonai horiekiko duten hizkuntza erreferentzia euskara bada, gazteen artean euskararen erabilera areagotzeko aukera izan daiteke pertsona ezagun horiekin biltzea, euskaraz: “Azken finean, euskarak erreferentzialtasuna behar du, bitarteko planteamendu desberdinekin”.
