58 film labur ekarriko ditu IKUSKAk aurten Pasaiara
Dena prest dute IKUSKA Nazioarteko Film Laburren XXI. Erakusketari hasiera emateko. Sail ofizialeko filmak hilaren 18tik 22ra proiektatuko dira.
Pasaiako udaletxean aurkeztu dute IKUSKAren XXI. edizioa. Astebetez, zinemaldi kutsua hartuko du Pasaiak. Abian da IKUSKA Pasaiako Badiako XXI. Film Laburren Erakusketa. Gaur aurkeztu dute Donibaneko Arizabalo Jauregian —Pasaiako udaletxean— dagoeneko bi mendetik gora bete dituen jaialdiak. Harrituta agertu dira antolatzaileak, film laburren erakusketa antolatzen hasi zirenean ez baitzuten uste, 21 urtez iraungo zuenik. Bada, ezusteko ezin hobea izan da haientzat eta gogorarazi dute hasieratik izan dituztela bidelagun Pasaiako Udaleko Kultur saila eta Trintxer Kultural.
Denborak aurrera egin ahala “errekor guztiak hautsi” dituzte antolatzaileen aburuz, izan ere, aurten 113 herrialdeko 3700 film laburrek izena eman dute erakusketan parte hartzeko. Gehienak Espainiar Estatuan ekoiztutakoak dira, atzetik Iran, India eta Brasiletik iritsitakoak. Izena emandako guztien artean, 58 dira festibalaren sail ezberdinetan parte hartuko duten film laburrak. Aurten lehen aldiz Maroko, Albania eta Malaysiako obrak sailkatu dira IKUSKAn parte hartzeko.
Ohiko sail ofizialaz gain, Mintzagun, Plural Femeninoa eta Gauguasa osatuko dute IKUSKA. Hirurak garrantzi handiko sailak dira, lehiaketaz kanpo dauden arren. “Erakusketarako osagarri bikainak” dira sortzaileen esanetan, ekarpen bereziak egiten baitituzte, hala nola, Femenino Pluralaren mezu soziala edota Gauguasaren umorea.
Euskarak berriz ere tarte berezia izango du . Oarsoaldeko Euskara Batzordearekin elkarlanean Mintzagun saila antolatu dute euskarazko film laburrik onena aukeratzeko. Sei film proiektatuko dira eta IKUSKAko ikusleek zein Oarsoaldeko euskaltegietako ikasleek erabaki beharko dute zein den irabazlea.
Sail ofiziala bestalde, Donibaneko Juanba Berasategi Auditorioan zein Trintxerpeko alkateordetzan ikusi ahalko da bere osotasunean, hau da, lehian ari diren film labur guztiak Donibanen eta Trintxerpen ikusi ahalko dira besterik ez. Donibanen ere tartea egin izanagatik pozik dira IKUSKAren antolatzaileak eta esker ona adierazi diote Itsas Mendi Elkarteari eta bereziki bertako kide den Joxan Eizagirreri, egindako lan guztiagatik.
Hainbat berrikuntzekin iritsi dira aurten baina ez diete betiko gauza onei uko egingo. Konpromisodun ikus-entzunezko sozialak lekua izaten jarraitzen dute, Oliver Laxe zuzendari galiziarraren O que arde kasu. Azken urteotan Galiziako natura etengabe suntsitu duten suteen gaia jorratzen du; zuzendariaren dionez “Galizia naturalari egindako requiem bat da”.
IKUSKA Pasaiako Badiako XXI. Film Laburren Erakusketaren egitarau osoa, hemen.
