Alaia Martinek etxean bilatuko du finalerako txartela, igandean
Gipuzkoako Bertsolari Txapelketako bigarren finalaurrekoa jokatuko dute Elorsoro kiroldegian. Oiartzuarra beste bost bertsolarirekin batera igoko da oholtzara.
Gipuzkoako Bertsolari Txapelketa azken aurreko fasean sartuta dago. Atzo jokatu zuten finalaurrekoetako lehenengo saioa. Agin Laburu nagusitu zen Arrasaten, eta zuzenean sailkatu da Donostian jokatuko den finalera.
Jokatuko diren hiru saioetako garaileak zuzenean joango dira finalera, eta gainontzeko bostak azkeneko sailkapenak erabakiko ditu.
Bigarren finalaurrekoa datorren igandean —hilak 24— izango da, Oiartzungo Elorsoro kiroldegian. 17:00etan hasiko da saioa, eta bertan izango da Alaia Martin oiartzuarra. 2015ean finaleko buruz burukoan aritu zen Beñat Gaztelumendi egungo txapeldunarekin, eta etxean finalera iristea bilatuko du. Gaztelumendi bera, Amaia Iturriotz, Ane Labaka, Asier Azpiroz eta Iñigo Mantzizidor helburu berarekin jarriko dira mikrofono aurrean. Sarrerak hemen klik eginda eros daitezke.
Honakoak izango dira egingo dituzten ariketak:
- Binaka, gaia emanda, hamarreko handian hiruna bertso.
- Binaka, gaia emanda, zortziko txikian hiruna bertso.
- Binaka, gaia emanda, 6 puntuko motzean hiruna bertso.
- Binaka, gaia emanda, zortziko txikian puntutan, zortzi bertso osatu arte.
- Kartzela: bakarka, gaia emanda, nahi den doinu eta neurrian, hiruna bertso.
