Lezoko PSE-EE: "Herrian gure presentzia indartu dugu"
Lezoko PSE-EE gustura dago azaroaren 10eko bozetan herrian lortutako emaitzekin. Espainiako Estatuan jasotako babesarekin ere gustura daude.
Jose Angel Sanchez da Lezoko sozialisten burua. Lezoko PSE-EEk hilaren 10ean egin ziren Espainiako Gorteetarako hauteskundeen balorazioa egin du. Apirilaren 28an egin ziren hauteskundeekin alderatuz, ehunekoetan lezoarren babes handiagoa lortu dutela adierazi dute, eta euren proiektua herrian sendotzen ari dela ziurtatu dute: “Azaroaren 10eko emaitzek garbi utzi dute herrian dugun presentzia indartu egin dela”. Joan den asteko igandeko bozetan 439 bozka jaso zituen PSOEk Lezon, apirilaren 28ko 472en aldean; ehunekotan, oraingoan %13,92koa izan da alderdiak Lezon izan duen babesa, aurrekoetan %13,68koa izan zelarik.
Sozialisten arabera, emaitza horiek etorkizunean hobetzeko lanean ari dira, “lezoarrekin batera, politika aurrerakoiak egiten, herria hobetzeko eta bizi-kalitatea handitzen jarraitu nahi dugu”.
Espainiako Estatuan jasotako emaitzekin ere “oso pozik” daudela adierazi dute Lezoko PSE-EEko kideek, eta aukera emango dutela Espainiako Gobernuan “berdintasunean, gizarte artapenean, iraunkortasunean, hezkuntzan eta kulturan” inbertsioak egiteko: “Finean, kudeaketa pertsonen zerbitzura eta erkidego autonomoen garapenera bideratuko da”.
