Haurtzaroaren Lagun Diren Hiriak programarekin bat egin du Lezoko Udalak
Haur eta Nerabeen Eskubideen Nazioarteko Egunari begirako lanketa berezia egingo du bihar. Unicefen programaren titulua lortzeko lanean hasi da.
Lezoko udaletxea. Bihar, asteazkena (hilak 20), Haur eta Nerabeen Eskubideen Nazioarteko Eguna da. Lezoko Udalak bat egin du mundu mailako deialdiarekin, eta herrian haurren eta nerabeen eskubideen gainean sortutako mitoei buruzko informazioa zabalduko du espazio publikoetan eta ikastetxeetan. Udaletxeko balkoian kartela jarriko du aldi berean, Haurren eskubideei buruzko hitzarmena leloarekin. Gainera, udalak jakinarazi du Unicefen Haurtzaroaren Lagun Diren Hiriak programarekin bat egin duela.
Udalaren esanetan, oraindik badira egoera edo bizi baldintza gogorretan bizi diren haur eta nerabeak, beraz, udalbatzak iaz onartutako konpromisoak berretsi egin dituela adierazi du: Haurren Eskubideen Konbentziorako atxikipena; udal eskumenen esparruan ahalegin guztiak egitea haurren eskubideei buruzko konbentzioan jasotakoa bete dadila berma dadin; eta haurren eta nerabeen ahotsa aintzat hartzea eurei dagozkien kontuetan.
Hori horrela, udalak zehaztu du haurrak eta nerabeak direla etorkizuna, eta ildo horretan, “gehiengoaren ongizatea nabarmen hobetu arren”, oraindik egoera zaurgarrian bizi diren haur eta nerabeak daudela berretsi du.
Unicefen programa
Lezon haurren eta nerabeen eskubideak bermatze aldera, Unicefen Haurtzaroaren Lagun Diren Hiriak izeneko programarekin bat egin du udalak. Herriak izendapen hori izan dezan, titulua lortu behar du, eta zeregin horretan ari dela jakinarazi du, betiere programa horrek eskatzen dituen ardurak eta konpromisoak bere eginez, “oraindik lan asko dago egiteke mundu zabalean haur eta nerabe guztien eskubideak bermatuak izatea lortzeko. Erronka hori guztion dagokigun ardura da, eta Lezoko Udalak gogor helduko die horiei”.
