Petra Lekuonako egoiliarrek euskara irakasten diete AEK-ko ikasleei
Intxixu AEK-ko ikasleekin mintzapraktika saioak egiten hasi dira, Oiartzungo euskara lehen eskutik ezagutzeko. Bi astean behin bildu nahi dute.
Lehenengo mintzapraktika saioa bukatutakoan egin zuten argazkia.
Zahartze aktiboa ez da kimera bat. Bestela, galde diezaietela Petra Lekuona Zaharren Etxeko egoiliarrei. Oraingoan, Intxixu AEK-koekin mintzapraktika saioak egiten hasi dira. Lehenengo saioa azaroaren 14an egin zuten; gustura daude han bizi direnak baita euskaltegiko ikasleak ere. Hurrengo saioa abenduaren 12an egingo dute, eta helburua da astean bi saio egitea.
Kafe baten bueltan biltzen dira ikasleak eta egoiliarrak, eta hainbat gai informali buruz aritzen dira solasean. Euskaraz, noski.
Hainbat helburu bilatzen dituzte bilera horiekin, euskaltegiko arduradunek adierazi dutenez: “Alde batetik, ikasleek klasean landutakoa praktikatzeko aukera izango dute testuinguru informal batean, eta horrez gain, bertako euskara entzutera ohitzen joan daitezke”.
Ikasleak ez dira onuradun bakarrak izango. Petra Lekuonako egoiliarrek haien esperientzia transmititzeko aukera izango dute, hainbat belaunaldietako jendearen integrazioa sustatuz. Gainera, gaurkotasuna duten gaiak landuko dituzte, eta kognitiboki estimulatzeko gunea izango da.
“Lehen saioan oso gustura aritu ziren, oso dibertigarria izan zen eta sekulako barreak egin zituzten. Ziur hurrengo saioetan konfiantza gehiago hartzean are hobeto pasako dutela!”, esan dute euskaltegiko arduradunek.
