'25 urte Luzuriaga gabe' erakusketa igandetik aurrera ikusgai
Hilaren 24ean, irekiko ditu ateak Pasai Antxoko faktoria ospetsuaren historia jorratzen duen erakusketa, enpresak itxi eta 25 urtera. Abenduaren 1ean bukatuko da.
Astebetez izango da ikusgai '25 urte Luzuriaga gabe' erakusketa. 25 urte igaro dira dagoeneko, Pasaiako Victorio Luzuriaga S.A. metalurgia enpresan ateak itxi zituenetik. Gaur egun, kasik arrastorik geratzen ez den arren, eragin handia izan zuen fabrikak Antxoren bilakaera historikoan eta Antxotarrok Historia Mintegiak erakusketa bat sortu du, Luzuriagaren garrantzia gogora ekartzeko.
25 urte Luzuriaga gabe erakusketa etzi hasiko da eta abenduaren 1a arte izango da ikusgai Pasai Antxoko kultur etxean. Igandeetan, hau da, inaugurazio eta amaiera egunetan 12:00etatik 14:00etara bisitatu ahalko da erakusketa. Astelehenetik ostiralera ordea, arratsaldeko ordutegia izango du; 19:00etatik 21:00etara. 22 panelez osatuko da erakusketa, bakoitzak testua eramango du eta hainbat gai jorratuko dituzte: langileria, testuinguru historikoa, arkitektura edota sortzen zituzten produktuak, besteak beste.
Urte askoz, Luzuriagak ikaragarrizko pisua izan zuen Antxon, ekonomikoa zein soziala eta hein batean, gaur egungo herria enpresaren jardunaren ondorio da. Herri gaztea izanik, Antxo Luzuriagarekin batera hazi zen, izan ere, toki askotako langileak iritsi ziren herrira, bertan lan egiteko. Gaur egungo antxotar asko, langile horien ondorengoak dira.
Era berean, Luzuriagaren eta orokorrean industria pisutsuaren krisialdiak gogor jo zuen Antxo eta bertan bizi ziren langileak. Iraganeko indarra berreskuratu ezinik, 1994ean itxi zuten Victorio Luzuriaga S.A. Baina fabrikarentzat aro baten amaiera izan zena, aro berri baten hasiera izan zen Antxorentzat. Urte askoz giltzapetu zuen herria hegoaldetik, herriaren hazkunde eta ingurumen ongizatea oztopatuz. Bertan utzitako espazioa, Antxoko arnasgune nagusietako bat da gaur egun. Oroigarri bakarra geratzen da, kasik utzita dagoen Luzuriagako bulegoen eraikina.
