8.840.000 euroko aurrekontu proiektua aurkeztu du gobernu taldeak
Lan ildo nagusiak zehaztu ditu, eta horrela, irisgarritasuna hobetzearekin lotuta, Ijurkon igogailua eraikitzea eta Mugikortasun planaren idazketa aipatu ditu. Herriko bigarren igogailua izango dena eraikitzeko 260.000 euro inbertitzea proposatu du.
2020 urterako 8.840.000 euroko aurrekontu proiektua aurkeztu du gobernu taldeak, “Lezo atseginagoa eta irisgarriagoa eraikitzeko helburuarekin”. Lan ildo nagusiak ere zehaztu ditu, eta horrela, irisgarritasuna hobetzearekin lotuta, Ijurkon igogailua eraikitzea eta Mugikortasun planaren idazketa aipatu ditu. Herriko bigarren igogailua izango dena eraikitzeko 260.000 euro inbertitzea proposatu du. Igogailuaren proiektua idazketa fasean dago une honetan, eta datorren urtean eraikitzen hastea aurreikusi du gobernu taldeak, otsaila aldera. “Igogailuaren helburu nagusia Ijurkoko irisgarritasuna eta bertako bizilagunen mugikortasuna erraztu eta hobetzea da”, zehaztu dute.
Mugikortasun planaren idazketarako, berriz, 30.000 euroko diru zatia aurreikusi du gobernu taldeak. “Eraginkortasunez” eta “era iraunkorrean” kudeatzea eta inbertitzea dela bere helburua gaineratu du gobernu taldeak, “herritarrek jasan behar duten presio fiskala baretzea eta beren bizi kalitatea hobetzea. Ekonomia eta enpleguak egungo gizartean duen eragina aintzat hartuta, hurrengo urtean ere Enplegu Planak dagokion diru zatia izango du”. Azken horretara zehazki, 125.000 euro bideratu dituzte aurrekontu proiektuan, “langabezian dauden pertsonei aukera berriak eskaintzeko”. Gizarte programa, zerbitzu,prestazio eta laguntzei bideratutako diru zati guztiak mantendu dituztela jakinarazi du, halaber.
Euskara, kultura eta kirola bultzatzea ere helburu dituela esan du gobernu taldeak. Euskarara, aurrekontu osoaren %3,86 bideratu du proiektuan, 340.890 euro; kultura eta kirola, berriz, “Lezoren nortasunaren ikur izaten” jarraituko dutela dio, eta horren adibidetzat jarri ditu datorren udarako prest egotea aurreikusi duen ur jolasen proiektua edota kiroldegiko mendebaldeko fatxadaren konponketa; Kulturara bideratutako kontu saila handitzea proposatu du, bestalde, baita festentzako diru zatia %21 handitzea.
2020ko aurrekontu proposamenean hainbat proiektu gehiago jaso ditu gobernu taldeak, eta aurtengo ekitaldia ixtean (2020ko apirilean) gauzatzea udal soberakinekin. Amaitzeko, 2019ko aurrekontuetan jasotako hainbat proiektu 2020an egin edo amaituko dituztela jakinarazi du gobernu taldeak, horien artean, hainbat oinezko pasabideak altxatzea (70.500 euro); Antonio Pildain kaleko espaloiak berritzea (300.000 euro); eta Altamirako eserleku eta barandak aldatzea, besteak beste (24:000 euro).
