Ahal Duguk, PSE-EEk eta EH Bilduk Boliviako "estatu kolpea" salatu dute
Hiru indar politikoek arbuiatu egin dute, Evo Morales bere kargua uztera behartu duen prozesua eta Pasaian antolatu daitezkeen mobilizazioetan parte hartzera deitu dute.
Evo Moralesen jarraitzaileen kontrako errepresioa salatu dute hiru alderdiek Argazkia: Askapena Erakunde Internazionalista Podemos Equo Berdeak, EH Bilduk eta PSE-EEk irmo salatu dute “Boliviako Estatu Plurinazioalean gertatutako estatu kolpea” eta ohartarazi dute gatazka soziala, aldeen arteko gatazka bihurtu daitekeela. Azaroaren 10ean “poliziek eta militarrek behartuta” dimisioa eman zuela adierazi dute hiru alderdiek “bere gobernuko kideen eta beste hainbat hautetsien senideen kontrako erasoak eman zirelarik”.
Azken asteotan, “estatu kolpea bultzatu duten indarrek, Moralesen alde antolatutako herritarrak erreprimitzen” ari direla gaineratu dute, eta tentsioa handitu ahala, “konfrontazio zibila” piztu daitekeela ohartarazi.
Egoera honen aurrean Podemos Equo Berdeak, PSE-EEk eta EH Bilduk adierazpen bateratua igorri dute. Gogor salatu nahi dute Bolivian eman den estatu kolpea. Boliviako herritarrei afera akordioaren bidez konpontzera deitu diete, denen eskubide zibil eta politikoak errespetatuz. Era berean estatu kolpearen kanpo bultzatzaileei, injerentzia eten eta Bolibiako soberania errespetatzeko eskatu diete. Elkartasun eta babes osoa igorri diete boliviarrei eta haien demokrazia sistema eta etorkizuna erabakitzeko eskubideari errespetu osoa agertu diote.
Evo Morales Ayma 2006an irabazi zituen hauteskundeak, buruzagi sindikala zela. Beste hiru aldiz irabazi zituen hauteskundeak eta aurten aurkeztu zen laugarren aldiz. Egungo afera, botoen zenbaketan du jatorria, hainbat erakundek ‘irregulartasunak’ salatzerakoan hasi baitziren mobilizazioak. Tentsioa handitu ala, polizia eta militarrek Morales babesteari utzi eta bere zein bere inguruko kontrakoen erasoak hasi ziren. Testuinguru horretan eman zuen dimisioa Moralesek. Gaur-gaurkoz, Jeanine Añez da Boliviako estatu buru, militarren babesarekin, inork bozkatu ez badu ere.
Azken urteotan geroz eta polemika handiagoa sortu zen Moralesen inguruan, boterea utzi nahi ez zuelakoan. Lehen legealdian bultzatu zuen haren alderdiak, beste batzuekin batera, agintea bi legealdira mugatzeko legea. Parlamentuaren eta herri galdeketa baten ezezkoak jaso arren, Moralesek laugarren aldiz hauteskundeetara aurkeztea erabaki zuen.
Dena dela, Morales presidente izan den tartean Boliviak hazkunde ikaragarria jasan zuen hainbat arlotan eta aberastasuna banatzeko plan orokorrak bultzatu ziren. Jatorrizko herrien eskubideen alde egindakoagatik da ezaguna Evo Moralesen gobernua. Baina aurrera pausuak beste hainbat esparruetan eman dira, hala nola, hezkuntzan, nazioarteko lankidetzan edota gutxiengoen integrazioan. Hego Amerikan azken hamarkadan bataz beste ekonomiko gehien hazi den herrialdeetako bat izan da Bolivia.
