(H)arian sustatuko dute euskara
abenduaren 2tik 5era bitartean, hitzaldi musikatua, Baga Biga Higa emanaldia eta Anje Duhalderekin kantu afaria antolatu dituzte. Egitarauarekin Euskararen Egunaren bueltan udalerrian antolatutakoak osatu eta indartu nahi dituztela esan dute Orereta Ikastolako arduradunek, eta herritar guztiak deitu dituzte parte hartzera "eta eragile izatera".
Orereta Ikastolak (H)arian euskara astea antolatu du. Egitarau zabala bezain aberatsa atondu du Orereta Ikastolak Euskararen Egunaren harira: (H)arian euskara astea. Hala, abenduaren 2tik 5era bitartean, hitzaldi musikatua, Baga Biga Higa emanaldia eta Anje Duhalderekin kantu afaria antolatu dituzte. Egitarauarekin Euskararen Egunaren bueltan udalerrian antolatutakoak osatu eta indartu nahi dituztela esan dute Orereta Ikastolako arduradunek, eta herritar guztiak deitu dituzte parte hartzera “eta eragile izatera”.
Abenduaren 2an, astelehenarekin Gotzon Barandiarran eta Rafa Ruedak Hitzaren ahairea. Zeri kantatzen diogu euskaldunok? emanaldia egingo dute Xeneplar Etxean , 19:00etan hasita. Abenduaren 4an berriz, ikasleek hartuko dute lekukoa, DBHko 4. mailako ikasleek zehazki, eta euskal ahozko literaturan oinarritutako emanaldia eskainiko diete herriko erretiratu eta aiton-amonei Niessen Kulturgunean. 12:30ean izango da Baga, Biga, Higa emanaldia, balada zaharrez, maite kantuez, kopla zaharrez, bertsolaritzaz, poesia sinbolikoaz eta sozialaz gozatzeko aukera emango dute ikasleek ordubeteko zuzeneko emanaldian.
Abenduaren 5ean, ostegunarekin, Anje Duhalderen kantu afaria egingo dute asteari amaiera emateko. Merkatuzarren izango da eta Ipar Euskal Herriko ikastolak laguntzeko antolatu du Orereta Ikastolak: “2017ko abenduan Benito Lertxundiren kontzertuarekin egin moduan, Luzatu eskua hara eta luzatu esku(h)ara lemapean, Zubiak eraikiz iniziatiban bidaide ditugun Hendaia, Biriatu, Ziburu eta Urruñako Ikastolak sustengatzeko iniziatiba da Anje Duhaldek doinua jarriko dion elkartasun afaria”. Kantu afarirako sarrerak dagoeneko salgai daude 30 euroan Xenpelar kultur dendan, ikastolako bulegoetan edo Orereta Ikastolaren webgunean eros daitezke. Afaria ez beste ekitaldiak doakoak dira.
