Euskararen Egunak egitarau oparoa izango du
Euskararen Egunaren harira, askotariko egitaraua antolatu du udalak. Gaur aurkeztu dute egitarau hori Itziar Ostolaza Hizkuntza Politiketako zinegotziak eta Joxe Mari Jauregi Euskara teknikariak.
Ostolaza eta Jauregi egitaraua aurkezteko gaur egin duten agerraldian. Euskararen Egunaren harira, askotariko egitaraua antolatu du udalak. Gaur aurkeztu dute egitarau hori Itziar Ostolaza Hizkuntza Politiketako zinegotziak eta Joxe Mari Jauregi Euskara teknikariak. Ostolazak azaldu duenez bi ekitaldi mota izango dira, “herritar guztientzat irekiak izango direnak, eta jarduera itxiak, publiko zehatz bati zuzendutakoak”.
Ekitaldi irekien barruan lehenengoa, Koldo Izagirre idazleak hilaren 28an 19:00etan emango duen hitzaldia. Bertso harriak goiburuarekin, berak idatzitako bertsoaren Harriak liburua oinarri hartuta eskainiko du hitzaldia eta batez ere Xenpelar bertsolariaren omenez Foru plazan dagoen eskulturari egingo dio erreferentzia. ez da bakarrik arituko lan horretan, Alaia Martin eta Haritz Casabal izango ditu bidaide.
Hilaren 29an, 19:00etan Oarsoarrak sariak banatuko dituzte Pasaiako Juanba Berasategi aretoan. Aurtengo sarituak, Kantu Jira eta Nerea Mujika izango dira.
Abenduaren 1ean, berriz, kantu Jirak irteera berezia egingo du herriko txistularien bandak lagunduta, herriko plazatik 12:00etan abiatuta. Euskararen Egunaren harira ezin zuen falta Mintzodromoak. Abenduaren 3an bertan egingo dute Merkatuzarren eta Xenpelar AEK eta Errenteriako Udal Euskaltegiko ikasleek hartuko dute parte 09:00etan hasita. Leku beran, baina arratsaldez, 18:00etan hitzaldi lan saioa egingo dute. Soziolinguistika Klusterreko Maialen Iñarrak hitzaldia egingo du 2018ko Euskaraldiak utzitako datuen gainean. Ostolazak zehaztu duenez, lan saio egingo dute ondoren datu horietatik abiatuta datorren urtean egingo den Euskaraldia definitzen hasteko, “erronka handia dugu eta Euskaraldia tresna garrantzitsua izango dela aintzat hartuta hura egoki definitzen hasi behar dugu jada”.
Ikasleei begira jarri dute egitaraua ere
Jarduera itxiak herriko ikastetxeetako ikasleei zein euskaltegietako ikasleei begirakoak izango dira. Dagoeneko ekitaldietako batzuk egin dituzte, tartean, Baga Biga saioak Mikel Marquez eta Eñaut Elorrietaren eskutik hilaren 14an. Herriko ikastetxeetako DBH3. mailako ikasleekin egin zuten saio hori.
Hilaren 25, 26 eta 27an berriz, Lehen Hezkuntzako haurrentzat Gure gazteak itzultzaile handiak saioak prestatu dituzte. saio horien bidez, Patxi Zubizarreta idazleak eta Fernando Rey itzultzaileak itzulpen literarioak dituen sekretuak erakutsiko dizkiete. Aurten ikastetxe gehiagok egin dutela bat iniziatiba horrekin nabarmendu du Ostolazak, “beraz, haur eta gazte gehiagorengana helduko gara”.
Azaroaren 27an izango da azken saio itxia Euskararen Egunarekin lotuta; euskaltegietako ikasleek, Agur Etxebeste filma ikusteko aukera izango dute.
Ostolazak zein Jauregik herritar guztiak deitu dituzte antolatutako ekintzetan parte hartzera, eta batez ere “euskaraz bizitzera”.
