Indarkeria sexista eta fobiarik gabeko herria eraikitzeko prest
Herritarrei eraso sexisten aurrean jarrera aktiboa izatera deitzen duten seinaleak jarri ditu Errenteriako Berdintasun Kontseiluak herriko lau sarreretan.
Indarkeria sexistaren aurkako mezua lau haizetara zabaltzen duten plakak jarri dituzte. Herritarrei eraso sexisten aurrean jarrera aktiboa izatera deitzen duten seinaleak jarri ditu Errenteriako Berdintasun Kontseiluak herriko lau sarreretan. Mezua argia, Errenterian eraso sexistei aurre egiten diegu. Lesbofobia, homofobia, transfobia, bifobia eta interfobiarik gabeko udalerria. Esaldia baino ez dute, more kolore biziko plakek eta lau puntutan kokatu dituzte: Beraun auzoan, San marko etorbideko biribilgune parean, Gabierrotan, Olibeteko biribilgunean eta Kaputxinoetan, herriko lau sarreratan.
Indarkeria Matxistaren Kontrako Egunaren bezperetan jarri dituzte lau plakak. Berdintasun kontseiluko hainbat kidek, Azipea Otaegi alkateak, Itziar Ostolaza Berdintasun zinegotziak eta Leti Bermejo Berdintasun teknikariak kendu dute San Marko bideko biribilgune pareko plakaren estalkia mezua agerian utzi eta lau haizetara zabaltzeko. Indarkeria sexista emakumeen eskubideen eta askatasunen aurkako eraso larria dela esan du Otaegik, “emakume eta gizonen arteko ezberdintasunaren adierazgarri eta ondorio garbia da, eta jakina denez desberdintasunek jarraitzen duten bitartean indarkeriak ez du amaierarik izango. Horregatik eman nahi izan diegu plakei, hain justu, jaso dugun mezu hori: Errenterian indarkeria sexistari aurre egiten diogu”.
Esaldiak bi hartzaileri zabaltzen dizkiela mezuak azaldu du Otaegik, “alde batetik erasotzaileei, eta mezuak garbi esaten die eraso bakoitzaren aurrean erantzun bat jasoko dutela; bestetik, emakumeei zuzendutako mezua, erasoen aurrean besoak gurutzaturik ez gelditzeko esaten diena, ahalduntzea eskatzen diena, emakumeen artean sareak sortzea beharrezkoa dela transmititzen diena; ahalduntze pertsonala eta ahalduntze kolektiboa tresna bezala”.
Iniziatiba Berdintasun Kontseilutik abiatutakoa dela nabarmendu du alkateak eta haren garrantziari erreparatu dio, “politika feministak egiteko, berdintasunaren aldeko politikak egiteko oso garrantzitsua da kontseilua, eta zehazki indarkeria matxistari aurre egiteko. Udalaren eta mugimendu feministaren arteko elkarlanerako ezinbesteko tresna da”.
Plakek ez dute udalaren armarririk eta ez dela kasuala hori azaldu du, bestalde. Mezu instituzional hutsa izatea ez zutela nahi esan du, “baizik eta udalaren eta mugimendu feministaren artean eraikitako eta sustatutako mezua”.
Berdintasun Kontseiluak gaurko agerraldia baliatu du hilaren 25ean, Indarkeria Matxistaren Kontrako Egunean Oreretako Asanblada Feministak 19:00etan deitu duen manifestazioarekin bat egiteko. Gogora ekarri du halaber, hilaren 26an (asteartea) Miren Ortubaik emango duen hitzaldia. Nola hobetu dezakegu indarkeria jasaten duten emakumeei ematen zaien arreta? goiburuarekin sistema penalari buruzko hausnarketa egiteko tresnak mahai gainean jarriko ditu. Ortubai, zuzenbide penalean eta indarkeria sexistan aditua da.
