Obrak Mendiola bidean, lurrak egonkortzeko
Hilaren 10ean luizia izan zen Mendiola bidean euriteen ondorioz. Gaur bertan hasi dira bidea konpondu eta magala egonkortzeko obrak, Pasaiako Udalak jakinarazi duenez.
Gaur bertan hasi dira Mendiola bidea konpontzeko obrak.
Azken asteotako euriteek hainbat kalte eragin dituzte, larriena Trintxerpeko Mendiola bidean gertatutakoa izan da. Hilaren 10ean luizi bat eman zen bide hartan eta ordutik urduritasuna zabaldu da bizilagunen artean, etxebizitzetatik oso gertu izan zela eta. Ezbeharra gertatu bezain laster udaleko teknikariak geologo profesional batengana jo zuten.
Pasaiako Udalak jakinarazi berri duenez, gaur hasi dira bidea konpondu eta Mendiola bideko magala egonkortzeko obrak. Lehenik eta behin, bidea kenduko dute eta jarraian, ikerketa geologikoen emaitzen arabera, neurri zehatzak hartuko dira, berriz ere luizirik gertatu ez dadin.
Pasaiako Udalak barkamena eskatu die inguruko bizilagunei, sortutako eragozpenengatik eta nabarmendu du, udal teknikariek esandakoaren arabera, ez dagoela inongo arriskurik inguruko etxebizitzentzat.
