Zigor Garro baldintzapean aske geldituko da
Zigor Garro euskal preso oreretarra eskumuturreko elektronikoarekin aske uztea onartu du Zigorrak Ezartzeko Parisko Dei Auzitegiak.
Zigor Garrok azken agurra eman dio amari senide eta lagunek babestuta. [Berria egunkaritik hartutako informazioa]
Zigor Garro euskal preso oreretarra eskumuturreko elektronikoarekin aske uztea onartu du Zigorrak Ezartzeko Parisko Dei Auzitegiak, hau da, presoak bere zigorra arintzeko eginiko eskaera ontzat eman du. Lehen aldia da Frantziak Hego Euskal Herriko euskal preso baten baldintzapeko askatasun eskaera onartzen duela. Fiskalak 24 ordutan ez badu erabakiaren kontra helegiterik aurkezten, Mont-de-Marsango espetxean dagoen oreretarra azaroaren 28an aske geratuko da, eta Hendaian bere familiak duen etxean igaro ahal izango ditu kondenaren azken hilabeteak. Naiz egunkariak jakinarazi duenez, logikak aginduko luke erabakia gauzatzea, baina Garroren abokatu Maritxu Paulus-Barsurcok zuhurtziaz jokatzeko gomendioa eman du: «Fiskalak logikoki jokatzen badu» presoak kondena eskumuturrekoarekin bukatzen ahalko duela, kanpoan. Hala ere “kontuz ibili” behar dela esan du, “helegite epeak” pasa bitartean.
Urriaren 23an egin zuten auzi saioa, eta ohi ez bezala, prokuradorea ez zen euskal presoa askatzearen kontra agertu. Azken hilabeteetan, behin baino gehiagotan eman diote presondegitik ateratzeko baimena Oreretako presoari: iazko otsailean bere amaren ehorzketan izan zen Zokoan (Lapurdi), eta geroztik, lanari lotutako hitzorduak izan ditu, aurtengo udan eta ikasturte hasieran. 2020ko udaberrian du kondena amaiera ofiziala.
2006an atzeman zuten Garro, Quezac herrian (Lozere, Frantzia), ETArekin lotuta; 2014an, 17 urteko presondegi zigorrera kondenatu zuten.
