[Galeria] Dibertsitatea altxorra dela frogatu dute Haziak Egunean
Haziak Eguna ospatzen ari dira gaur Oiartzunen. Dibertsitateak bertatik bertara ezagutzen ari dira haurrak eta helduak, modu dinamikoan.
Haizea eta ura dira gaurko protagonistak. Eta ez meteorologikoki bakarrik. Izan ere, Oiartzunen Haziak Eguna ospatzen ari dira. Goizean, Haizea eta Ura izeneko eremutan banatu dira Haurtzaro Ikastolara hurbildu diren haur eta helduak.
Helduak Haizea eremuan elkartu dira, eta kultura herrikoia eta emakumeak gaiak jorratu dituzte, modu ireki eta dinamiko batean. Ura eremuan, berriz, familiak elkartu dira. Lehendabizi, Euskal Herriko haur transexualak —eta familiak— batzen dituen Naizen elkarteko Bea Serverrek hainbat azalpen eman dizkie. Genero identitateetan aniztasuna dagoela erakutsi die; aniztasun hori osatzeko, bakoitza bakarra dela, eta bakar izate horretan dagoela altxorra nabarmendu du Severrek.
Azalpenen ondoren, haurrak bi taldetan banatu dira. Batzuk margoekin eta beste batzuk guraizeekin —collageak egiteko—, bakoitza nor den azaltzen saiatu dira. Kutxa magikoak egiteko aukera ez dute alferrik galdu.
Orain Elizalde Herri Eskolan bazkaltzen ari dira, eta Haizea zein Ura eremuetan bizi eta sentitutakoa partekatuko dute parte hartzaileek.
Eguna aurrera eramateko VeDi, Ilusionista Sozialak, Naizen, Sorburu kooperatiba eta Garaipen elkarteen kolaborazioa izan dute, baita herriko bi ikastetxeena ere.
