Merkataritza txikiaren alde egin ahal izango da ostiralean
Oarsoaldeko merkatari elkarteak kanpaina egiten ari dira komertzio txikiaren alde. 'Nik Oiartzunen' lelopean festa egingo dute.
Eskualdeko merkatariek antolatu dute kanpaina. Merkataritza txikiak ez ditu sasoirik onenak bizi, eta horri bultzada bat emateko asmoz, Oarsoaldeko hiru merkatari elkarteek kanpaina abiarazi dute. Pasa den asteburuan Errenteria-Oreretara eta Pasaiara eraman zuten kanpaina, eta ostiralean Oiartzunen txanda izango da.
Nik Oiartzunen lelopean, festa txiki bat egingo dute Done Eztebe plazan. 16:30ean hasiko da Itturri Ginkana, Abaraxkak gidatuta; ludotekakoek marrazki tailerra egingo dute.
18:00etan helduko da ekitaldi nagusia, trikitilarien musikarekin batera. Ordu erdi geroago, txokolatea banatuko dute.
19:30ean ostalaritza sustatuko dute, plaza inguruko tabernetan egingo duten trikipoteoarekin. 20:30erako atxikimendu argazki erraldoia egingo dute plazan.
Merkatari elkarteetakoek adierazi dutenez, oso garrantzitsua izango da Oiartzungo bizilagunen partaidetza. “Izan ere”, jarraitu dute, “kanpainaren kartel identifikagarri batekin argazkiak egiteko photocall bat egongo da. Nik Oiartzunen dioen kartela eskuan, herritarrek herrian erosten dutela adierazi ahal izango dute, herriko merkataritzari atxikimendua adieraziz”.
Hala ere, atxikimendurik onena egunerokotasunean herriko 165 establezimenduetako batean —edo bitan, edo…— erostea izango da.
