Pasaiako Udalak 850.000 euro bideratuko ditu inbertsioetara 2020ean
Podemos eta udal gobernuak aurrekontuen inguruko akordioa adostu zuten. EH Bilduk akordiorik lortu ez badu ere, alde guztien arteko borondate ona eskertu zuen.
2020. urtean Pasaiako Udalak 850.00 euro izango ditu hainbat arloetan inbertitzeko. Atzo iluntzean egin zen Pasaiako udalbatzaren ohiko udalbatzarra Arizabalo Jauregian. Aurrekontuak eta hauei lotutako emendakinak nabarmendu ziren saioaren lehen erdian. Podemos Pasaia Equo Berdeak-ek eta EH Bilduk emendakinak iragarri zituzten, baina azken orduko aldaketak izan ziren. Lehen aldiz legealdi berrian, udal gobernuak eta EH Bildu, oposizioko talde nagusiak, elkar ulertze eta lankidetzarako borondatea erakutsi zuten. Podemosek, ordea, Donibaneko saneamendu obretan 50.000 euro gehiago inbertitzeko akordioa itxi zuen udal gobernuarekin. Ondorioz emendakinak atzera bota zituzten.
Podemosek galdeginda, gastuen errepasoa egin zuen gobernuak. 2020. urtean Pasaiako Udalak 850.000 euro izango ditu hainbat arlotan inbertitzeko, “asko ala gutxi den ez dakit, baina udal honek duen diru kopurua hori da”, adierazi zuen Izaskun Gomez alkateak. Diru gehiago gastatu nahiko luketela gaineratu zuen, baina, “aurrekontuaren izaera sozialaz” harro agertu zen. Aurrekontuen %20 inguru zerbitzu sozialetara bideratuko ditu udalak.
Aurrekontuak izan ziren, ordea, eguneko gai nagusia. Erabateko akordiorik lortu ez bazen ere, baliteke aurrekontuen negoziazioak elkarlanerako aro berri bat erraztu izana. Podemosek iragarritako emendakina atzera bota zuen, udal gobernuarekin akordioa itxi ostean. Gobernuak, 2020ean Donibaneko saneamenduan 50.000 euro gehiago inbertitzeko konpromisoa hartu zuen.
EH Bilduk, berriz, ez zuen emendakin osoa erretiratu, baina “elkarlanerako erakutsitako borondatea” eskertu zuen Junkal Mintegia koalizioko bozeramaileak, baita udal gobernuaren “keinuak” ere. Denbora falta zela-eta akordiorik lortu ez arren, etorkizunari begira baikor dela esan zuen Mintegiak, “argi dugu etorkizunean gai izango garela adostutako aurrekontu batzuk mahai gainean jartzeko”.
Pasaiako bi indar politiko nagusiek leundu zuten haien erretorika, PSE-EEko zinegotzi Lore Suarezek EH Bilduren hitzak eskertu baitzituen, “argi dut hainbat gaietan denok ados gaudela, eta adostasun horretatik hainbat proiekturi ekitea beharrezkoa da, pasaitarren ongizatea hobetzeko”. Hirigintza zinegotzi eta EAJko buru Nahikari Oterminek, bestalde, kargu hartu zien koalizioko kideei, aurrekontuei lotutako dokumentuan —nahasketa bat izan zen itzulpenarekin—, islatuta zeuden akatsengatik eta zehaztasun ezagatik.
Aurrekontuen parte bat Donibaneko saneamendurako izango denez, hainbat herritarrek plenoa jarraitu zuten. Hitz egiteko tartea izan zutenean, bizilagunak kexu agertu ziren berriz ere, proiektuaren inguruan dagoen informazio faltagatik. Udalak azaldu zuenez, obra bi partetan egingo da: URA Agentziak eta Añarbek uretatik egingo dute obra batetik, eta Pasaiako Udala lurra altxatzeaz arduratuko da. Adierazitakoaren arabera, 2020ko irailean hasiko lirateke obrak. 12 urtez zain egon ondoren, bizilagunek mesfidati zeudela salatu zuten, eta informazio iturri zuzen bat eskatzeaz gain, konpromisoa bermatzeko neurriak hartzea eskatu zioten alkateari.
