Zaldunbordako 'outlet' erraldoiari ezetz esan dio Errenteriako plenoak
Udalak aho batez egin du bat mozioarekin, eta tokiko merkataritza txikia sustatzearen alde egin du.
Zaldunbordan egin nahi duten outlet erraldoiaren proiektua gelditzeko eskatzen duen afixa Iztieta auzoko saltoki batean. Ohiko oso bilkura egin zuen atzo Errenteriako udalbatzak, eta bertan Zaldunbordan eraiki nahi duten outlet erraldoiaren gaineko mozioa aztertu zuten. Mozio horren atzean, Errenkoalde Errenteriako merkatari, ostalari eta zerbitzuak biltzen dituen elkartea eta eskaera zehatza plenoari: proiektuaren gaineko jarrera erakustea, Hondarribiko Udalari atzera egiteko eskatzea proiektu erraldoiarekin, eta proiektuaren kontra Zaldunborda Gelditu plataformaren manifestua babestea.
Puntu guztiak babestu zituen plenoak, aho batez, udal talde guztien babesarekin.
Zaldunbordan eraiki nahi duten outlet erraldoiak 28.000 metro koadro lituzke eta ehun komertziotik gora hartuko lituzke, 133 miloi euroko inbertsioa behar luke eta 1.800 autoentzako aparkalekua aurreikusi dute. Ondorioak, agerikoak: Bidaso eta Oarsoaldeko tokiko merkataritza txikiari konpondu ezinezko kaltea eragingo lioke, ingurumena kaltetzearekin batera. Dendartean Gipuzkoako Merkatari, Ostalari, Zerbitzu Enpresa eta Autonomo Elkarteen bilkurak salatu duenez Europan egindako ikerketa guztiek erakutsi dute halako merkataritza ereduek sortzen dituzten lanpostuen bikoitza suntsitzen dituztela. Lan prekarioa sustatzen dutela ere salatu Dendartean elkarteak.
Proiektuak ondorio ekologiko eta ekonomiko larriak eta mugikortasun arazo handiak sortuko dituela ere salatu dute mozioan. Udalak aho batez egin du bat mozioarekin, eta tokiko merkataritza txikia sustatzearen alde egin du.
