Behin-behineko eraikina lizitatu dute Proisa kokatzen zen lursailean
Lizitazioak 80.000 euro balioko ditu, hasierako proposamenak eskatzen zuena baino 50.000 euro gehiago hain zuzen ere.
Irudian, behin-behineko eraikinaren diseinua. Pasaiako Udaleko Hirigintza Sailak, Proisa (Produktu Industrialak SA) enpresa kokatzen zen lekuan, behin-behineko eraikina egingo dutela jakinarazi du. 80.000 euroan lizitatu dute obra, partaidetzazko aurrekontuetako proposamenak eskatzen zuena baino 50.000 euro gehiago, hau da, aurreikusita zegoenaren bikoitza baino gehiago. Gipuzkoako Foru Aldundiko Kultura Saila arduratuko da gainkostuaz.
Urte askoz erabilera ezberdinak izan ondoren, hutsik da lursaila eta herritar askok erabilera kulturala izan dezala eskatu izan dute. 450 metro karratu inguruko lursaila da eta bertan kokatuko da 94 metro karratuko behin-behineko eraikina. Sarrera zuzena izango du plazara eta bi espazio osagarri gehituko dizkiote, komun bat —kaletik ere sartu ahalko da— eta biltegi bat.
Basa Arquitectura SA enpresarena da esleitutako diseinua eta aldez aurretik egindako edukiontziekin altxatuko da eraikina, “Urretxun dauzkaten edukiontziak bisitatzera joan ginen nola egin genezakeen ikusteko, baina kontzeptua erabat ezberdina zen, eta ez zigun adibide gisa balio izan” adierazi dute Pasaiako Udaleko iturriek. Izan ere, proiektu honen garapena, uste baino luzeago jo du topatu dituzten zailtasunak direla eta, “ezaugarri hauekin udalerrian eta ingurunean egiten ari diren lehen jarduketa da eta oso zaila izan da aurrera eramateko formula aurkitzea”. diote iturri berberek. Proiektua gauzatu nahi duten enpresek hilaren 6ra arteko epea izango dute eskaintzak egiteko.
