Ostiralean, fandango eta arin-arin koreografia jaialdia Niessenen
Beti Prest dantza taldeak antolatu du, eta Euskal Herriko hainbat talde izango dituzte alboan, 18:30ean hasiko den jaialdian.
Beti Prest taldeko kideak. Beti Prest dantza taldeak antolatuta, ostiralean eta Errenteriako Niessen kulturgunean, fandango eta ari-arin koreografia jaialdiaz gozatzeko aukera izango da. 18:30ean hasiko da, eta sarrera libre da, eserleku guztiak bete arte. Hala ere, bertaratzen direnek elkartasun diru ekarpena egiteko aukera izango dute: Mindara elkartea lagundu nahi dutenek, horretarako aukera izango dute.
Beti Prest taldekoek iragarri dute koreografia berritzaileak izango direla Niessengo oholtzan larunbatean. Errenteriarrak ez dira bakarrik egongo, ordea, Niessenen: Trintxerpeko Illunbe Dantza Taldea, Hendaiako Mutxiko Elkartea, Bergarako Moises Azpiazu Dantza Taldea, eta Lezoko Fandango eta Arin-Arin Dantza Eskolakoak ere izango dira jaialdian.
“Jaialdian 90 dantzari baino gehiago izango dira, fandangoa eta arin-arina oinarri hartuta, beraien aniztasuna eta koreografiak erakutsiaz. Zenbait taldek harritu ere egingo gaituzte munduko musikak erabiliz, gure tradiziokoak ez diren doinuak erabiliko dituztelako”, esan dute Beti Presteko kideek.
Ekitaldian, Jesus Mari Garate omenduko dute. Euskal Herriko hainbat talderentzat makina bat koreografia egindakoa izan zen Garate, eta jaialdia hura omentzeko baliatuko dute.
Beraz, gonbidapena eginda dago. Dantzaren zaleek hitzordua dute ostiralean Niessenen, oso erakargarria gainera.
