Aintzane Galardiren lanak, 'Lurra eta dardara' antologia poetikoan
Poeta oiartzuarraren hainbat poema bildu dituzte, beste zazpi emakumeenekin batera, Balea Zuria argitaletxeak publikatu duen antologian.
'Lurra eta dardara'-n parte hartu du oiartzuarrak [Argazkia: uberan.eus]. Balea Zuria argitaletxeak zortzi emakumeren ahotsak, poemetan islatuta, bildu ditu Lurra eta dardara antologian. Tartean dira Aintzane Galardi poeta oiartzuarrarenak.
Galardiriz gain, Amaia Lasa, Itxaro Borda, Tere Irastortza, Amaia Iturbide, Miren Agur Meabe, Castillo Suarez eta Leire Bilbaori eskatu dizkiote beren lanak. Felipe Juaristi Balea Zuria argitaletxeko editoreak azaldu duenez, poeta bakoitzaren ibilbidearen adierazpide egokiak izan daitezkeen lanak eskatu dizkiete. Horiei, oraindik argitaratu gabeko bi poema gehitu zaizkie.
Galardik bere obretako hamar lan eskaini ditu, eta beste bi idatzi. Lehenengo liburutik ez du bat bera ere hautatu, eta beste hiruretako lanak aukeratu ditu (Zirrikituak, 2007, Euskaltzaindia/BBK; Mendafin usaineko iluntzeak, 2015, Erein; Hegodun poemak, 2018, Denonartean).
