Ekolo enpresa nafarra, 'San Juan' baleontziaren babesle berria
Produktu ekologikoak ekoizten dituen arroiztar enpresak 'San Juan' Baleontziaren eraikuntza babeste duen sarearekin bat egiteko akordioa itxi du Albaolarekin.
Ekolok eta Albaolak San Juan baleontzia babesteko akordioa lotu dute. San Juan Baleontziak babesle berri bat du, Ekolo produktu ekologikoak ekoizten dituen enpresa hain zuzen ere. Arroitzen (Lizarraldea, Nafarroa) du egoitza Ekolok, eta haien helburua Slow Food filosofian oinarrituta, elikadura osasuntsuagoa eta jasangarriagoa sustatzea da. Ekolok dagoeneko jaso du babesle diploma eta haren logoa enpresa babesleen panelean jarri dute.
Kolaborazio hau, bi eragileek partekatzen dituzten prozesu jasangarrietatik dator. Biek egin dute ekoizpen eredu desberdin baten alde, ingurumenaren zaintza oinarritzat hartuta eta ohitura jasangarriak sustatuz bakoitzaren lan esparruan.
Albaola zein Ekolorentzat lehengaiek dute garrantzia. San Juan baleontzia egiteko adibidez ez da edozein egur erabili. Baso teknikarien aholkupean harizti eta pagadietatik lortu dituzte enbor egokienak, gehienak Nafarroako Sakana eta Iratiko haranetatik, betiere, modu jasangarrian. Ekolok ere Nafarroan du ekoizpen gune nagusia, haien baratz ekologikoak bertan kokatzen baitira.
