[Galeria] 110 mingain dantzan, denak euskaraz
Euskararen Eguna jantzi du goiz goizetik eguerdira arte mintzodromoak. Merkatuzarrek hartu du aurten, eta bertan 110 lagun aritu dira jo eta su, barra-barra, erruz, batzuk lotsatiago eta besteak lotsagabe, baina denak euskaraz.
Mintzodromoa 2019 familia argazkia. Argazkia: Xenpelar AEK Euskararen Eguna jantzi du goiz goizetik eguerdira arte mintzodromoak. Merkatuzarrek hartu du aurten, eta bertan 110 lagun aritu dira jo eta su, barra-barra, erruz, batzuk lotsatiago eta besteak lotsagabe, baina denak euskaraz. Xenpelar AEK, Udal Euskaltegiko eta Lau Haizetara Euskaltzaleon Topaguneak dinamizatzen duen Mintzalaguna programako hainbat kidek hartu dute parte euskararen aldeko iniziatiban.
Xixilio Maritxalar Lau Haizetara Topaguneko presidenteak hartu du hitza mintzodromoari hasiera emateko. Esker ona azaldu die euskararen aldeko hautua egin duten guztiei, zoriondu euskararen unibertsoaren ikasketa prozesuan murgildu direnei egindako hautuagatik eta saiakera zintzoagatik, eta mintzodromoaren gisako espazioen beharra aldarrikatu du, “hizkuntza erabiltzea garrantzitsua delako, ezinbestekoa, bizirik dagoela erakusteko”.
Ordu eta erdiz egunerokotasuneko hainbat gai jorratu dituzte mintzodromoaren goxora bildu direnek abilezia eta tresna gehiagorekin batzuk eta baliabide gutxiagorekin beste batzuk euskararen bidea hasi berria dutelako. B1 mailatik aurrerako ikasleei begirakoa dela mintzodromoa azaldu du Xenpelar AEK Euskaltegiko kide den Idoia Arbelaitzek, baina euren kasuan A1 eta A2 mailetako ikasleek ere izaten dute tartea iniziatiban: “Batera jartzen ditugu eta beren lanketa xumeagoa da. Halere, badute gaitasuna beren burua aurkeztu eta beren zaletasunak azaltzeko, baita galdera errazak erantzuteko ere, eta horretan aritu dira. Uste dugu, beraiei ere erakutsi behar diegula unibertso hau, eta parez pare zabaldu euskal komunitatearen atea beraiek ere parte izan daitezen”.
Euskaraldia datorren urtean, 2020an helduko da. Hala ere, mintzodromoko parte hartzaileen artean Aho Bizi eta Belarri Presten txapak banatu dituzte mintzodromoaren antolatzaileek —Lau Haizetara Euskaltzaleon Topaguneak, Xenpelar AEK Euskaltegiak, Errenteriako Udal Euskaltegiak, eta Errenteriako Udalak antolatzen dute elkarlanean— bakoitzak nahi duen konpromisoa har dezan euskararekin.
Amaitzeko familia argazkia eta pintxoak… horiek ere euskara petoan.
Ondokoak Xenpelar AEKren argazkiak dira.
