Txistorra frijituaren lainoak Oiartzun estaliko du hilaren 14an
Txerri Eguna ospatuko dute hurrengo larunbatean. Txerria eta txerrikiak izango dira protagonista, baina ez bakarrak, Ttur-tturrek antolatutako festan.
Eguerdian ikastetxeetako dantza taldeek emanaldiak eskainiko dituzte. Gezurra badirudi ere, udazkenari azkeneko egunak falta zaizkio. Eta hori, Oiartzunen, festaren seinale da. Hilaren 14an Txerri Eguna ospatuko dute Madalensoro pilotalekuan eta inguruetan.
Ttur-ttur Euskaltzaleon Bilguneak eta herriko eragileek larunbat goiz eta eguerdirako egitarau polita prestatu dute. Ohi bezala, azokan bertako artisauen produktuak erosteko aukera egongo da goizean zehar.
“Azoka antolatzeko helburu nagusia tokian tokiko artisauei leku egitea eta merkataritza mota hori bultzatzea ez ezik, euskarazko merkataritza-harremanak sustatzea ere bada. Horregatik, postua jarriko duten artisau, talde eta eragileei euskaraz egitea eskatzen diegu”, azaldu du Ttur-tturrek.
Ildo horretan, azokako txartel guztiak euskaraz egongo direla bermatu du euskara elkarteak.
Ganadu feria eta postuak
Artisauak izango dira kalean egongo direnak, baina kalean abereak izango dira. Oiartzuar talde batek egindako lanari esker, ganadu feria egongo da aurten ere. Behiak, zaldiak, behorrak, oiloak, ahuntzak, txerriak eta abar ikusteko aukera izango da aire zabaleko pilotalekuan.
Herriko ikastetxeetako ikasleek euren kontuak finantzatzeko jartzen dituzten postuek ez dute hutsik egingo. Hori guztia 10:00etatik 14:00etara bitartean izango da, eta tarte horretan beste hainbat ekitaldi egingo dituzte. Eta ohi bezala, baserritarrez jantzita joateko eskatu dute.
Egitaraua
- 10:00etatik 14:00etara: Ganadu feria.
- 11:30ean: Erraldoi txikiak dantzatzeko tailerra herriko plazan, Abaraxka eta Soinueneak antolatuta.
- 12:00etan: Haurtzaro Dantza Taldearen kalejira, Done Eztebe plazatik hasita.
- 12:00etan: Elizalde Dantza Taldearen emanaldia, Euskal Herria plazatik abiatuta.
- 13:00etan: Itturri Merkatari Elkartearen zozketa eta argazki lehiaketako sari banaketa.
- 13:30ean: Errigorako saskien eta Paeta zaharrak erantzun mahai jokoen zozketa.
