Irri bat opari eta txokolate jate solidarioa, PSE-EEren eskutik
Bi elkartasun kanpaina jarri ditu martxan Errenteriako alderdi sozialistak.
PSE-EEko eta Gurutze Gorriko kideak, opari emate ekitaldian. Bi elkartasun kanpaina jarri ditu martxan Errenteriako alderdi sozialistak. Irri bat opari, ezaguna da jada, eta horren bidez behar gehien duten herritarren artean banatzeko opari berrien bilketa egingo dute Herriko Etxean Alderdi Sozialistako gazteek eta Gurutze Gorriak lagunduta. Urtarrilaren 2ra arte jasoko dituzte opariak. Gabonei begira haur guztiek oparia izatea bilatzen dute kanpainarekin, eta horren harira herritar guztiak deitu dituzte parte hartzera eta elkartasuna oparitzera. Jostailuak berriak izan behar dute, ez erabilitakoak, eta jasotakoa Gurutze Gorrira eramango du alderdi sozialistak. Honakoa kanpainaren zortzigarren ekinaldia izango da.
Bestalde, ostegunean, txokolate jate solidarioa antolatu dute 17:00etan hasita Herriko Etxean euro batean. Venezuelako haurrei bideratzeko izango da bildutako guztia. Iraungi gabeko botikak, 0-24 hilabete arteko haurrentzako bigarren eskuko arropa, sobreko zopa, pureak, esne-hautsa eta eskola materiala jasoko dute. Halaber, tailerrak antolatu dituzte txokolate jatearekin batera: madalenen apainketa, gabonetako postalak egin, marrazketa eta eskulanak.
Bi horiek ez dira, baina, antolatu dituzten bakarrak. Hilaren 21ean, samn Tomas egunarekin Alderdi Sozialistako gazteek txosna jarriko dute Herriko Plazan. Bildutako dirua Gurutze Gorriari emango diote Gabonetako behar handiena dutenen artean banatzeko jostailuak erosi ahal izateko.
Herritar zein merkatariei dei egin diete ekarpena egitera.
