Urmendi Haur Eskolako irakasleak hezkidetza formazioa jaso dute
Udaleko Feminismo Sailak antolatu du formazio saioa, hezkidetza lehentasun estrategikoa dela uste dutelako. Haurtzaron eta Elizalden ere gaia landuko dute.
Irailetik azarora bitartean egin dituzte saioak.
Oiartzungo Udaleko Feminismo Sailak jakinarazi duenez, hezkidetza formazio saioak antolatu ditu, lan lerro hori estrategikoa delako.
Hori dela eta, Urmendi Haur Eskolako langile guztiek (zuzendaritza, irakasleak eta sukaldariak) hamar orduko formakuntza jaso dute irailetik azaroa bitartean, Eider Goiburu hezitzailearekin.
Herriko beste ikastetxeetan ere formakuntza eskaini dute: Haurtzaro Ikastolan dagoeneko formakuntza jaso dute zuzendaritza taldeak eta hainbat zikloetako hezkidetza lantaldeko irakasleek.
Elizalde Herri Eskolan eta Elizalde Institutuan, berriz, hezkidetzako formakuntza egiteko aukera eskaini du udalak, hezkidetzaren gaia ildo berean lantzeko eta txertatzeko. Formakuntza antolatzen ari dira momentu honetan ikastetxeak zein udala, elkarlanean.
Baloreen transmisioa
Udalak garrantzitsutzat jotzen du hezkidetza lantzea. Horrela azaldu du: “Oiartzunen hezkuntza formalean aritzen diren profesionalak hezkidetzan trebatzeak -hezkidetza zer den jakitea, zertan eragiten duen…- garrantzitsua da, baloreak transmititzen dizkietelako Oiartzungo haur eta gazteei”.
Gaineratu duenez, Oiartzungo ikastetxe bakoitzak bere Hezkidetza Plangintza osatzea ahalbidetu nahi dute. Horretarako, elkarlanari esker, formakuntza izango da lehenengo urratsa. “Udalak motor lana egingo du hezkidetzarekin herriko hezkuntza komunitatearen konpromisoa bilatzeko”, gaineratu du erakundeak.
