Haurtzaro Ikastolak urteroko batzar nagusia egin du
Indarrean dagoen ikasturtean egindako berrikuntzak errepasatu zituzten, eta ikastolaren alde sozialari buruzko jarduerak ere izan zituzten hizpide.
Ostiralean egin zuten batzarra.
Haurtzaro Ikastolak urteko ohiko batzarra egin zuen pasa den ostiralean. Bertan, ikastolak dituen proiektuei eta jarduerei buruz aritu ziren.
Iñaki Uzkudun ikastolako presidenteak azaldu zuenez, 2019-2020 ikasturtea proiektuak indartzeko balio izango du. “Etengabeko berrikuntzan murgilduta, duela bi urte Haur Hezkuntzan martxan jarritako marko berria Lehen Hezkuntzako 1. ziklora garatzen hasiko gara”, adierazi zuen Uzkudunek. Orain dela urte batzuk martxan jarri zen EKI programari buruz, berriz, presidenteak iragarri zuen Lehen Hezkuntzako laugarren mailan material berriarekin hasiko direla.
Hezkidetza programa
Gurasoak hezkidetzan formatzeko hainbat saio egin dituztela gogorarazi zuen Uzkudunek, eta horretan jarraituko dutela. Agurtzane Etxeberria gurasoak, berriz, saioetan sortutako hausnarketak eta iradokizunak zerrendatu zituen.
Gainera, aurten berdintasunari eman nahi diote garrantzia, eta bide horretan, hezkidetzari bultzada eman nahi diote ikasturte honetan.
Ez da garrantzitsutzat jotzen duten arlo bakarra: komunikazioa ere indartu nahi dute. Horretarako, langile bat kontratatu dute, eta komunikazio taldea indartu.
Eragile soziala
Ikastolaren eraikinetik harago egiten dituzten jarduerak ere aipatu zituzten. “Herrian eragile sendoa izaten jarraitu nahi dugu, bertako ekintzetan parte hartuz, herritarrekin harremana izanez, ez bakarrik gazteekin, baita zaharrekin ere”, esan zuen ikastolaren arduradunak.
Horrela, gogorarazi zuen Matia Fundazioak ikastolari aitortza egin ziola duela gutxi, Petra Lekuonako egoiliarrekin egiten dituzten saioengatik.
Bestalde, aipatu zuten Nafarroa Oinez antolatu duen Argia ikastola lagundu dutela. Gainera, Kilometroak jaiaren eredu berriari buruz aritu zen Nekane Artola, Kilometroak elkarteko presidentea: azken bi urteetan egin den hausnarketa prozesua izan zuen hizpide.
Bukatzeko, Uzkudunek aldarrikatu zuen ikastolaren jarduteko era auzolana dela: “Halaxe sortu zen ikastola, hala iraun du hainbeste urtean, eta gero ere hala jokatu beharko du, aurrera egin nahi badu”.
