Bigarren kanporaketa ere gaindituta
Paper ezin hobea EPLEko pilotariak jokatzen ari direna. Bitik bi gaindituta, Euskal Herriko Kluben Arteko VI Nazio txapelketako bigarren fasera heldu dira. Urrats garrantzitsua errenteriarrentzat, izan ere, lehenengo aldia da txapelketa honetan fase horretara heltzen direla
Ibon Eskisabel EPLEko pilotaria, partida batean. Argazkia: Gipuzkoako Euskal Pilota Federazioa. Paper ezin hobea EPLEko pilotariak jokatzen ari direna. Bitik bi gaindituta, Euskal Herriko Kluben Arteko VI Nazio txapelketako bigarren fasera heldu dira. Urrats garrantzitsua errenteriarrentzat, zian ere, lehenengo aldia da txapelketa honetan fase horretara heltzen direla. Igandean Idiazabalen jokatutako partidetan Adonisek 15-2 utzi zuen markagailua Aiestaranen aurka lau t’ erdiko partidan. Puntu horretara helduta Aiestaranek min hartu eta partida utzi behar izan zuen, beraz, lehenengo puntua heldu zen EPLEko pilotarientzat.
Arangurenek, berriz, 18-12 irabazi zuen Agirreren kontra. 12. tantora arte gogorra izan zen partida, eta parekatua, baina azkenean, EPLEkoak garaipena lortu zuen alde handiarekin.
Binakakoan ez zuten ezer jokoan jada Tabernak eta Odriozolak eta ezin izan zituzten Larrazabal eta Legarreta gainditu, 2-22 galdu zuten EPLEkoek Amurriokoen aurka. EPLE 2 eta Amurrio 1 eta bigarren fasera heldu dira errenteriarrak. Partida urtarrilaren 12an izango da Igarondo pilotalekuan Nafarroako Paz Ziganda elkarteko pilotarien aurka.
Pala motza
Pala motzeko hiru finalaurrekoei dagokienean, Lehen Mailan Eskisabel eta Rubenek 37-40 galdu zuten Realeko Milhet eta Vigeonen aurka. Bigarren Mailako finalerdietan, Brosak eta Abelek Oiangu 3 gainditu zuten, 28-40, eta Lehen Mailara igotzea lortu dute. Bigarren Mailako beste finalerdian Eiheramendik eta Yorelek 40-38 galdu zuten Oiangu 1en aurka eta finala jokatzeko atarian gelditu dira. Pena.
Talde guztiek finalean sartzeko aukerarik izan ez duten arren, EPLEren palista guztiak nabarmendu ditu neurri berean elkarteak, azken urteetako pala motzeko Gipuzkoako txapelketarik onena osatzen ari baitira ziurrenik.
Alebinetan, berriz, Aitor Etxeberria EPLEko pilotariak Baztango txapelketaren txapeldunorde izatea lortu du Intxurre klubeko Elolarekin bikote osatuta 12-18 Altzua eta Alberdiren aurka.
