[Galeria] baten faltan, hiru San Tomas azoka izan dituzte Pasaian
San Tomas izan zen asteburuko protagonista Pasaian. San Pedron eta Antxon larunbatean ospatu zuten, Donibanen ordea atzoko eguna aukeratu zuten.
Larunbat goizean antolatu zen Antxon San Tomas azoka. Hiru barruti, hiru San Tomas azoka eta jai giro paregabe berdina. Zergatik lehiatu besteekin, jaia bitan eta gainera herrian bertan ospatzeko aukera baldin badago? Ongi dakite hori Pasaian, izan ere, Eguberrien atariko honetan, San Tomas izan da asteburuko protagonista nagusia Pasaiako badiaren inguruetan.
Larunbatean hartu zuen Antxo, dagoeneko azoka historiko bihurtu dena. Hormigoi eta metalezko oihana izanagatik ere, beste garai bateko kutsua hartu zuen herriak goizetik. Gastronomia, kultura, artisautza eta nola ez, jai giroa abileziaz uztartuko zituzten antxotarrek. Txistorra eta taloez harago badagoelako zer jan, Antxoko Topaguneak babarrun jatea antolatu zuen.
San Pedron ere larunbatean ospatu zuten jaia, eta Antxoko ildo beretik joango ziren; han ere babarrunak kozinatu zituzten Begi Haundin eta Antxetan. Aurretik, postuak, musika, haurren kantaldia, taloak eta bestelakoak izango ziren baita herriko gazteen kontzertua ere Arraunlari kalean.
Atzo bestalde, Donibanen ospatu zuten San Tomas. Goizetik hartu zuen herriko plazak azoka tradizionalaren itxura. Barazki postuez eta abereen guneez gain, beti bezala artisautza postuak ere izan ziren, hortaz, opari politak erostearekin batera, tokiko artisauei bultzada emango zieten sanjuandarrek.
HITZAk hiru jaialdien argazki onenak bildu eta honako galeria osatu du.
