Gutxieneko zerbitzu duinak eskatu dituzte Pasaiako udaltzainek
Langile falta eta lan pilaketa dela eta elkarretaratzea egin dute Pasaiako hainbat udaltzainek, Trintxerpeko Alkateordetzaren sarreran.
Udaltzaingoaren langileen batzarrak elkarretaratzea egin dute Trintxerpen. Pasaiako Udaltzainek haien egoera salatzeko jarduerekin jarraitzen dute. Gaur bertan elkarretaratzea egin dute zenbait udaltzainek, langile batzarraren izenean, udalari egungo egoerari irtenbide bat ematea eskatzeko. Hilaren 12an Pasaiako Udaltzaingoaren langileen batzarrak, erakundeak egun bizi duen langile falta salatu zuen, HITZAra bidalitako gutun baten bidez.
Udaltzainen arabera, langile eskasia dute, Arkautik bete beharko lituzkeen plazak ez direlako betetzen ari. Ondorioz, lan-poltsa hustuz joan dela dio Udaltzaingoko langileen batzarrak. Egoera hark, pasaitarren segurtasuna kaltetu dezakeela ohartarazi dute. Hori dela eta gutxienezko zerbitzu duinak eta kalitatezkoak eskatu dituzte Trintxerpeko Alkateordetzaren sarreran. LAB sindikatuak bat egin du elkarretaratzearekin.
Pasaiako Udal Gobernuak bestelako iritzia du. Iruzurretan aritzea egotzi dio Udaltzaingoaren langileen batzarrari. Aitortu dute “salbuespenezko egoera bat” bizi dutela udaltzaingoan baina argi eta garbi ukatu egin dute gutunean helarazitakoa, “pasaiatarren segurtasuna ez dago arriskuan”. Langileen batzarrak adierazitakoa “astakeria” dela diote EAJ eta PSEk eta interes propioen arabera jokatzea egotzi diote.
EH Bilduk, oposizioko talde politiko nagusiak, ezinbestekotzat du herri mailako konponbide bat topatzea. Udal gobernu, Udaltzaingo eta gainontzeko talde politikoen elkarlana eskatu dute, subiranisten kezka nagusia “egoerari lehenbailehen buelta ematea” baita. Dena dela, “babes osoa” adierazi diote Udaltzaingoari eta egoera hau duela aspaldi iragarri zutela gaineratu dute.
