Astelehenean erabakiko da nork jokatuko duen pala txapelketako finala
Xanisteban Eguneko Pala Txapelketako final zortzirenak eta final laurdenak jokatu dituzte azken bi asteetan. Astelehenean, berriz, finalerdiak.
Unai Aroztegik Julen Loidi gainditu zuen atzo arratsean. Xanisteban Eguneko Pala Txapelketa bukatzeko partida gutxi batzuk besterik ez dira falta. Aste honetan eta aurrekoan jokatu dituzte final zortzirenak eta final laurdenak.
Finalerdiak, berriz, astelehen arratsaldean jokatuko dituzte. 19:00etan hasita, Unai eta Jon Aroztegik elkarren kontra jokatu beharko dute, eta partida hori bukatzean, Aritz Eskudero eta Jon Juanes arituko dira nor baino nor.
Xanisteban Eguneko Pala Txapelketako finalak datorren ostegunean jokatuko dituzte. 18:15ean, kimuen txanda izango da; 18:35ean, Haur Mailakoena; gizonen kontsolazio finala, 19:00etan; eta 19:45ean, final handia.
XVI. banakako pala txapelketa oraindik ez da bukatu, baina Girizia elkartearen pilota saila Euskal Herri Pala Txapelketa Irekia antolatzen hasi da. Bikoteek izena eman dezakete jada.
