Ehiza legean egindako zuzenketak Ulian ehizatzea debekatuko du
Eusko Legebiltzarrak Ehiza Legearen zuzenketa bat onartu du ohiko osoko bilkuran eta ondorioz tiro gehiagorik ez da egingo Ulian
Ehiza Legearen zuzenketak, jarduera debekatuko du Ulian. Irailean kezka handia agertu zuten talde ekologistek, Ulia inguruko bizilagunek eta Trintxerpeko biztanleria oro har, Ulian ehizatzea baimendu zuelako Gipuzkoako Foru Aldundiak, epai baten ondorioz. Ehiza zaleek kolpea jaso dute, Eusko Legebiltzarrak Ulian tiro egiteari bidea moztu dio eta. Ohiko Bilkuran Ehiza Legearen zuzenketa bat onartu du legebiltzarrak eta ondorioz ezingo da tirorik Pasaia eta Donostia baten dituen mendian.
Albiste ona da ezinbestean Eguzki Talde Ekologistarentzat, “poztu besterik ezin dugu egin”. Zentzuzko erabakia hartu dutela iruditzen zaie ekologistei eta txalotu egin dute erabakiak izan duen babes politikoa, “zuzenketa legebiltzarrean ordezkatuta dauden bost indar politikoek bultzatu eta onartu dute”.
Ehiza ahalbidetzen zuen epaiak gaizki erredaktatua zegoelakoan, legebiltzarrak egindako zuzenketak eskumenak eman dizkio aldundiari, kasu hauetan esku hartu ahal izateko; hau da, Ulian ehizatu ahal den ala ez erabakitzeko. Erabakiak “parkeaz lasaitasunez gozatzeko” aukera ematen duela adierazi du Eguzkik.
