Euskal Eskola Publikoarekin, harro
Euskal Eskola Publikoari bere atxikimendua erakutsi dio Koldo Mitxelena Herri Ikastetxeko Hezkuntza Komunitateak. Argazki erraldoia egin zuten atzo ikastetxearen jolastokian Euskal Eskola Publikoarekiko harrotasuna adierazi eta euskal hezkuntza sistema osorako eskola bakarra aldarrikatzeko, "herri bezala publikoaren, eskubide kolektiboen eta gure ume guztientzat aukera berdintasunaren alde eginez".
Euskal Eskola Publikoarekin harro daudela esan zuten hamarnaka lagunek. Euskal Eskola Publikoari bere atxikimendua erakutsi dio Koldo Mitxelena Herri Ikastetxeko Hezkuntza Komunitateak. Argazki erraldoia egin zuten atzo ikastetxearen jolastokian Euskal Eskola Publikoarekiko harrotasuna adierazi eta euskal hezkuntza sistema osorako eskola bakarra aldarrikatzeko, “herri bezala publikoaren, eskubide kolektiboen eta gure ume guztientzat aukera berdintasunaren alde eginez”.
Atzo arratsaldean egin zuten familia argazkia, baita adierazpena ere. Hezkuntza publikoa, historian zehar izandako lorpenik handienetako bat dela esan zuten bildutakoek, “eta bere garapena gizarte honetan bizi garenon berdintasun eta ongizate maila adierazlerik onena”. Argi dute, hezkuntzarako eskubidea eskola publikoan gauzatu dela, “denontzat eraikia, denona delako eta guztiontzat, zerbitzu publiko doakoa eta unibertsala eskaintzen duen bakarra. Tinko sinesten dugu hezkuntza publikoaren balioa, hezkuntza inklusiboa, euskalduna, laikoa eta doakoa, aniztasunean eta hezkidetzan konprometitua, berdintasunean eta kalitatean oinarritutakoa, ikasle guztien hezkuntza integrala eta gizarte-kohesioa bermatzen dituena”.
Zerbitzu publikoak eta bereziki eskola publikoa gobernuen jomugan daudela salatu zuten atzo argazkira bildutakoek; azken urteetan zerbitzu horien pribatizatze politika garbia bultzatu den zalantzarik ez dela erantsi zuten, “eskola publikoari murrizketak ezarri eta irakaskuntza ekimen pribatu guztiei kontzertazioa eman diete, eta hezkuntza sistema duala gauzatu dute: ikasle guztiei aukera berak ematen ez dizkiena, beren egoera sozio ekonomikoaren, jatorriaren edo erlijioaren arabera bereizi, eta jatorrizko ezberdintasunak mantentzen dituena”.
Finkatutako hezkuntza sistema integrazioaren aurka doala salatu dute, gainera, eta gizarte zatiketa eta haustura bultzatzea egotzi, “sare publikoa bigarren mailara baztertuz”. Eraikitzen ari direna sistema “diskriminatzailea” eta “segregatzailea” dela esan zuten, “hori guztia diru publikoarekin finantziatuta”. Eusko Jaurlaritzari politika pribatizatzailean beste urrats bat egieta leporatu zioten gainera azken horrek hezkuntza publikoko komunitate osoaren oposizioarekin abiatu nahi duen hezkuntza lege berriarekin, “zerbitzu publiko kontzelptuan oinarrituta, desberdinak diren bi hezkuntza sare, publikoa eta pribatua, berdin finantzatuko ditu lege horrek”.
Koldo Mitxelena ikastetxeko hezkuntza komunitateak, gainera, Euskal Eskola Publikoaren alde eta hezkuntza sistemaren pribatizazioaren aurka deituko diren ekintzekin bat egingo duela jakinarazi zuen.
