Ontzi handiagoak hartzeko moldaketak egin nahi ditu Portu Agintaritzak
Atzo egindako agerraldian Pasaiako Portuko Agintaritzak hurrengo urteetan izango dituen erronka nagusien berri eman zuen.
Pasaiako Portu Agintaritzak ezinbesteko ikusten du moldaketak egitea. Pasaiako Portu Agintaritzak ezinbesteko ikusten du moldaketak egitea, portua lehiakorra izaten jarrai dezan. Hobetu behar diren esparru zehatzak zeintzuk diren jakiteko, portuaren hobekuntza operatiborako azterketa egin dute azken hilabeteetan.
Felix Garciandia lehendakariak adierazitakoaren arabera, Pasaiako Portuak garai berrietara egokitu beharko du. Egokitze lan horren eredu gisa, Iberdrolaren Zentral Termikoak utzitako espazioa nabarmendu du “Arcelor Mittal enpresak gune hartan erakutsitako interesak, inbertsioak areagotzea eragin du”.
Etorkizunerako erronkak, lau multzotan laburbildu ditu. Erabilgarritasuna, edukiera, ingurumena eta produktibitatea. Lehendakariaren aburuz, esparru guzti horietan aurrera egin beharko da, portuak aurrera egin dezan. Finean, proposatutako inbertsioan portua handitzearen baliokide dira.
Gaur egun, Pasaiako Portuan sartzen diren itsasontzi gehienak, 140 metrotik beherako luzera dute. Itsasontzi handiagoak erakartzea dute helburu orain, bereziki UECC enpresako ro-ro ontziak. Abantailak baino ez dizkiete ikusten ontzi horiei. Alde batetik etekin ekonomiko handiagoak eragiten dituztelako eta bestetik epe luzean CO2 isurketak murrizten direlako, betiere, Portu Agintaritzak adierazitakoaren arabera.
