«Zerbitzu sozial bat betetzen ari garela uste dut»
Xixilio Maritxalar Lau Haizetara Euskaltzaleon Topaguneko presidentea da. Aurtengo Olentzero eta Mari Domingiren etorrera berritasunekin dator, eta horiez mintzatu da HITZArekin.
Xixilio Maritxalar. Berritasunekin dator Olentzero eta Mari Domingiren etorrera, ezta?
Aurtengo ibilbidea lau hanka-paloren laguntzarekin egingo dugu, hori da beritasunetako bat. Hanka-paloak herriko Oinarrizko Lanbide Heziketako ikasleek egin dituzte. Hau da gure hirugarren urtea haiekin elkarlanean eta, gure ekintza aberasteaz gain, zerbitzu sozial bat betetzen ari garela uste dut. B plan bat edo ordezko plana ere badugu, euria egingo balu: Herriko Plazak aterperik ez duenez, Koldo Mitxelena eskolako jolastoki estalira pasako genuke oholtza.
Hanka-paloak, bi neska eta bi mutil izango dira.
Bai, hala da. Parekotasunean fokua jarri nahi genuen, eta bi neska eta bi mutilez osatzea erabaki dugu hanka-paloen taldea. 2006an Mari Domingi sartzea erabaki genuen bezala, emakumeek parte aktibo izan behar dutela uste dugu.
Herrian babesa duen ekintza da Lau Haizetara Euskaltzaleon Topagunearen egitasmo hau.
Etorrera egiten hasi ginenean, hiru Olentzero elkartzen ginen herrian. Ez zegoen denentzako lekua. Gu hasiberriak ginen, eta 60 haur elkartu genituen lehen urtean. Handitu nahi genuen. Hortaz, etorrera abenduaren 24tik 23ra pasa genuen. Tradizio kutsu hori galtzen da, baina asmatu genuela iruditzen zait. Umeak eta gurasoak lasaiago dabiltza. Egun, 500-700 haur inguru hurbiltzen dira. Muskulua badago.
