Pasaiako badiak hartuko ditu ETE eta KAE ligen lehen estropadak
Sanpedrotarra Arraun Elkarteak eta San Juan Koxtape Arraun Elkarteak uztailaren 11n ekingo diote denboraldiari, Pasaiako uretan jokatuko den erlojupekoan.
San Juan Koxtapeko hiru tripulazioek, uztailaren 11an ekingo diote lehiari, etxekoen aurrean.. San Juan Koxtapek eta Sanpedrotarrak sare sozialetan baieztatu berri dute, KAE eta ETE ligak uztailaren 11n hasiko direla, Pasaian. Emakumeen Traineruen Elkarteen eta Kantauriko Arraun Elkarteen ligan parte hartzen dute Pasaiako tripulazio guztiek; San Juan Koxtapeko hiru tripulazioek (Batelerak eta gizonezkoen A eta B tripulazioak) eta San Pedroko traineru bakarrak. Beraz, etxean ekingo diote sasoi berriari arrosek eta moreek.
‘Libia’-k maila polita erakutsi zuen martxoko San Pedroko Test Estropadan. Irudia: Josu Z.
COVID-19ak dena hankaz gora utzi eta gero, denboraldirako egutegi bat adostea lortu dute KAE eta ETEko kideek. Formatua baina, ezohikoa izango da halabeharrez. Berria egunkariak atzo argitaratutakoaren arabera, 12 estropadako liga izatea adostu elkarteek eta bost guneetan baino ez dira egingo estropadak, tartean, Pasaiako badian.
Uztailaren 11koan, erlojupeko estropada izango da eta oraindik ere ordutegia zehazteke dago. Ziurra dena da, KAE eta ETE ligak lehiatuko direla eta Pasaian hasiko direla. Ez da badiak hartuko duen estropada bakarra izango; uztailaren 26rako sei luzeko estropada bat ere iragarri baitute. Gainontzeko estropadak, Getaria, Getxo, Santander eta Castro Urdiales artean banatuko dira.
